दुष्काळग्रस्त तालुक्यांच्या यादीत कल्याण तालुक्याचाही समावेश करा! शिवसेना आमदार विश्वनाथ भोईर यांची उपमुख्यमंत्री एकनाथ शिंदे यांच्याकडे मागणी कल्याण पश्चिम, पूर्व आणि ग्रामीण भागातील शेतकऱ्यांना दुष्काळाचा मोठा फटका; पावसाअभावी भात आणि भाजीपाला पिकांचे नुकसान, शेतकऱ्यांना भरीव मदत देण्याची मागणी कल्याण : महाराष्ट्रातील ८० टक्के तालुक्यांमध्ये पावसाअभावी दुष्काळ जाहीर करण्यात आला असताना, ठाणे जिल्ह्यातील कल्याण तालुक्याचाही दुष्काळग्रस्त तालुक्यांच्या यादीत समावेश करण्यात यावा, अशी मागणी कल्याण पश्चिमचे आमदार विश्वनाथ भोईर यांनी केली आहे. यासंदर्भात त्यांनी राज्याचे उपमुख्यमंत्री तथा नगरविकास मंत्री एकनाथ शिंदे यांना लेखी निवेदन दिले आहे. कल्याण पश्चिम, कल्याण पूर्व आणि कल्याण ग्रामीण परिसरातील अनेक शेतकरी आजही भूमिपुत्र म्हणून शेतीवर अवलंबून आहेत. मात्र, यंदा पावसाने ओढ दिल्याने शेतीचे मोठ्या प्रमाणावर नुकसान झाले आहे. शेतकऱ्यांनी मेहनतीने लागवड केलेल्या भात आणि भाजीपाला पिकांचे नुकसान झाल्याने त्यांच्या उदरनिर्वाहाचा गंभीर प्रश्न निर्माण झाला आहे. पिकांचे नुकसान; शेतकऱ्यांसमोर आर्थिक संकट पावसाअभावी पिकांना पुरेसे पाणी मिळाले नसल्याने अनेक शेतकऱ्यांच्या हातातोंडाशी आलेला घास हिरावला गेला आहे. शेतीतून मिळणारे उत्पन्न घटल्याने शेतकरी कुटुंबांवर आर्थिक संकट ओढवले असून, त्यांना दैनंदिन खर्च भागवणेही कठीण होत असल्याचे आमदार भोईर यांनी निवेदनात नमूद केले आहे. कल्याण तालुक्याचा दुष्काळग्रस्त यादीत समावेश करण्याची मागणी राज्य सरकारने ज्या निकषांच्या आधारे महाराष्ट्रातील ८० टक्के तालुके दुष्काळग्रस्त घोषित केले आहेत, त्याच निकषांवर ठाणे जिल्ह्यातील कल्याण तालुक्याचाही समावेश करण्यात यावा, अशी मागणी आमदार विश्वनाथ भोईर यांनी केली आहे. कल्याण तालुक्यातील स्थानिक शेतकऱ्यांना शासनाच्या दुष्काळी उपाययोजनांचा लाभ मिळावा आणि त्यांना भरीव आर्थिक मदत देण्यात यावी, अशी विनंती त्यांनी उपमुख्यमंत्री एकनाथ शिंदे यांच्याकडे केली आहे.

Uploaded: 2026-10-23T18:32:36.000Z
Duration: 60 s
Channel: jilhavarta
Description: Watch the latest news video on Public App.

Kalyan, Thane | Oct 23, 2026

MORE NEWS