शेतकऱ्यांच्या मदतीसाठी कल्याणात ‘दिवाळी पहाट’; आर्थिक मदतीला उत्स्फूर्त प्रतिसाद! भाजप कल्याण पश्चिम, मंगेशी ग्रुप आणि कल्याण गौरवचा स्तुत्य उपक्रम; मुख्यमंत्री सहायता निधीसाठी सामाजिक संस्था, उद्योजक आणि नागरिकांचा मदतीचा हात दिवाळीचा आनंद साजरा करतानाच संकटात सापडलेल्या बळीराजाला मदतीचा हात देण्याचा सामाजिक बांधिलकीचा आदर्श कल्याणमध्ये पाहायला मिळाला. भारतीय जनता पक्ष कल्याण पश्चिम, मंगेशी ग्रुप आणि कल्याण गौरव यांच्या संयुक्त विद्यमाने आयोजित ‘दिवाळी पहाट’ कार्यक्रमाला कल्याणकरांचा उत्स्फूर्त प्रतिसाद लाभला. या कार्यक्रमाच्या माध्यमातून दुष्काळग्रस्त शेतकऱ्यांच्या मदतीसाठी मुख्यमंत्री सहायता निधीत आर्थिक योगदान देण्यात आले. कल्याण पश्चिमेतील आद्य क्रांतिकारी वासुदेव बळवंत फडके मैदान येथे या विशेष कार्यक्रमाचे आयोजन करण्यात आले होते. पहाटेपासूनच संगीतप्रेमी नागरिकांनी मोठ्या संख्येने उपस्थिती लावत कार्यक्रमाचा आनंद घेतला. मात्र, यंदाच्या दिवाळी पहाटचे विशेष आकर्षण केवळ संगीताची मैफल नव्हती, तर शेतकऱ्यांच्या मदतीसाठी एकत्र आलेल्या सामाजिक संस्था, उद्योजक आणि नागरिकांचा सहभाग हे ठरले. कार्यक्रमादरम्यान कल्याणमधील विविध सामाजिक संस्था, बांधकाम व्यावसायिक, उद्योजक आणि नागरिकांनी मुख्यमंत्री सहायता निधीसाठी आर्थिक मदतीचा हात पुढे केला. विशेष म्हणजे, या उपक्रमात सहभागी होऊ इच्छिणाऱ्यांना पुढील दोन दिवसही आयोजकांकडे धनादेशाद्वारे आर्थिक योगदान देता येणार आहे. नामवंत गायकांच्या सुरेल मैफलीने रसिक मंत्रमुग्ध या दिवाळी पहाट कार्यक्रमात मराठी भक्तिगीते, संत तुकारामांचे अभंग, भावगीते तसेच पुरस्कारप्राप्त मराठी चित्रपटांमधील लोकप्रिय गीतांची सुरेल मैफल रंगली. सुप्रसिद्ध पार्श्वगायक ज्ञानेश्वर मेश्राम, हर्षवर्धन वावरे, पार्श्वगायिका आनंदी जोशी आणि भाग्यश्री देशपांडे यांनी आपल्या सुमधुर गायनाने उपस्थित रसिकांना मंत्रमुग्ध केले. भक्तिसंगीत आणि मराठी भावगीतांच्या सुरांनी फडके मैदानावरील वातावरण भक्तिमय झाले होते. सुप्रसिद्ध निवेदिका दीप्ती भागवत यांच्या बहारदार निवेदनाने कार्यक्रमाची रंगत आणखी वाढवली.

Kalyan, Thane | Nov 10, 2026

MORE NEWS