शिवप्रेरणा मित्र मंडळाचा अनोखा दीपोत्सव; दुर्गम भागातील विद्यार्थ्यांच्या चेहऱ्यावर फुलवले हास्य! भिवंडीतील जिल्हा परिषद शाळांमधील विद्यार्थ्यांना मिठाई, आवश्यक वस्तू व भेटवस्तूंचे वाटप; सामाजिक बांधिलकी जपत दिवाळी साजरी दिवाळी म्हणजे आनंद, उत्साह आणि प्रकाशाचा सण. मात्र, हा आनंद केवळ स्वतःपुरता मर्यादित न ठेवता समाजातील गरजू विद्यार्थ्यांच्या आयुष्यातही आनंदाचा प्रकाश पसरवण्याचे स्तुत्य कार्य कल्याण पश्चिमेतील दुर्गानगर, ठाणकरपाडा येथील शिवप्रेरणा मित्र मंडळाने केले आहे. मंडळाच्या वतीने 'दीपोत्सव २०२६' या उपक्रमांतर्गत भिवंडी तालुक्यातील दुर्गम भागातील जिल्हा परिषद शाळांमधील विद्यार्थ्यांना मिठाई, आवश्यक वस्तू आणि भेटवस्तूंचे वाटप करून सामाजिक बांधिलकी जपत दिवाळी साजरी करण्यात आली. शिवप्रेरणा मित्र मंडळ गेल्या अनेक वर्षांपासून हा सामाजिक उपक्रम सातत्याने राबवत आहे. दिवाळीच्या निमित्ताने ग्रामीण आणि दुर्गम भागातील विद्यार्थ्यांपर्यंत पोहोचून त्यांच्यासोबत सणाचा आनंद वाटण्याची परंपरा मंडळाने जपली आहे. मंडळाच्या या उपक्रमामुळे विद्यार्थ्यांच्या चेहऱ्यावर आनंद आणि समाधानाचे हास्य फुलले. शिक्षक शरद ठाणगे यांच्या पुढाकारातून सामाजिक उपक्रम या उपक्रमाच्या यशस्वी आयोजनात मंडळाचे खजिनदार शरद ठाणगे यांचा मोलाचा वाटा आहे. ठाणगे हे भिवंडी तालुक्यातील लाप गाव येथील जिल्हा परिषद शाळेत शिक्षक म्हणून कार्यरत आहेत. विद्यार्थ्यांच्या गरजा आणि ग्रामीण भागातील शैक्षणिक परिस्थितीची जाणीव असल्याने त्यांच्या पुढाकारातून मंडळाच्या सहकार्याने दरवर्षी हा उपक्रम राबवण्यात येतो. विशेष म्हणजे, शिवप्रेरणा मित्र मंडळ दरवर्षी माघी गणेशोत्सव मोठ्या उत्साहात आणि जल्लोषात साजरा करते. मात्र, धार्मिक आणि सांस्कृतिक उत्सवांपुरतेच मर्यादित न राहता सामाजिक कार्यातही मंडळाने आपली वेगळी ओळख निर्माण केली आहे. उत्सवाच्या माध्यमातून एकत्र येणाऱ्या कार्यकर्त्यांनी समाजातील गरजू घटकांसाठी योगदान देण्याची परंपरा कायम ठेवली आहे. मंडळाच्या कार्यकर्त्यांचा उत्स्फूर्त सहभाग या सामाजिक उपक्रमात स्वप्नील मोरे, प्रदीप हुले, प्रीतम मोरे, भूपेंद्र मोरे, आशिष साठे, अनंता पगार, ओंकार धात्रक, दत्ता भडवीळकर, शशांक हळदणकर, अवधूत चरतकर, शरद ठाणगे, विपुल मोरे, चिराग महाडिक, रितेश पाबळे, मयूर राठोड, सचिन जाधव, शेखर कांबळे, कुशल चव्हाण, ओम उबाळे, जीत शेट्टी, सिद्दू सणस, किर्ष सदगीर, लालू बोनदारडे, वैभव तेली, सौरभ महाडिक, सचिन आहेर, अमित मोरे यांच्यासह मंडळाच्या कार्यकर्त्यांनी सक्रिय सहभाग नोंदवला.

Kalyan, Thane | Nov 10, 2026

MORE NEWS