முண்டியம்பாக்கம் அரசு மருத்துவக் கல்லூரி மருத்துவமனையில் செவித்திறன் பரிசோதனையில் அலட்சியமா? — நோயாளி குற்றச்சாட்டு; மாவட்ட நிர்வாகம் விசாரிக்க கோரிக்கை
விழுப்புரம்: முண்டியம்பாக்கம் அரசு மருத்துவக் கல்லூரி மருத்துவமனையில் காது, மூக்கு, தொண்டை பிரிவில் நோயாளிகளுக்கு உரிய முறையில் பரிசோதனை மேற்கொள்ளப்படுவதில்லை என்றும், மாற்றுத்திறனாளிகளுக்கான மருத்துவச் சான்றிதழ் வழங்குவதில் அலட்சியம் காட்டப்படுவதாகவும் பொதுமக்கள் தரப்பில் குற்றச்சாட்டுகள் எழுந்துள்ளன.
காது கேட்கவில்லை என புகார்
விழுப்புரம் பகுதியைச் சேர்ந்த ஒருவர், தனக்கு காது சரியாக கேட்கவில்லை எனக் கூறி முண்டியம்பாக்கம் அரசு மருத்துவக் கல்லூரி மருத்துவமனையில் காது, மூக்கு, தொண்டை பிரிவு மருத்துவரை அணுகியதாக கூறப்படுகிறது.
அப்போது அவரை பரிசோதித்த மருத்துவர், காது கேட்பதில் எந்தப் பிரச்சினையும் இல்லை எனக் கூறி அனுப்பியதாகவும், ஆனால் தனக்கு காது சரியாக கேட்கவில்லை என நோயாளி மீண்டும் தெரிவித்தபோதும், பிரச்சினை இல்லை எனக் கூறப்பட்டதாகவும் புகார் தெரிவிக்கப்பட்டுள்ளது.
ஜிப்மரில் பரிசோதனை
இதையடுத்து அந்த நபர் புதுச்சேரியில் உள்ள ஜிப்மர் மருத்துவமனைக்கு சென்று மீண்டும் பரிசோதனை மேற்கொண்டதாக கூறப்படுகிறது. அங்கு நடத்தப்பட்ட பரிசோதனையில் அவருக்கு சுமார் 40 சதவீதம் செவித்திறன் குறைபாடு இருப்பதாக மருத்துவர்கள் தெரிவித்ததாகவும், அதற்கான சிகிச்சையை அவர் தொடர்ந்து பெற்று வருவதாகவும் கூறப்படுகிறது.
ஒரே நபருக்கு இரு மருத்துவமனைகளில் மேற்கொள்ளப்பட்ட பரிசோதனைகளின் முடிவுகள் மாறுபட்டதாக கூறப்படுவது பொதுமக்கள் மத்தியில் அதிர்ச்சியை ஏற்படுத்தியுள்ளது.
பலரும் புகார்
இதுபோன்று முண்டியம்பாக்கம் அரசு மருத்துவக் கல்லூரி மருத்துவமனையில் காது கேளாமை, பார்வைக் குறைபாடு உள்ளிட்ட மாற்றுத்திறன் தொடர்பான பாதிப்புகளுடன் வரும் நோயாளிகள் உரிய முறையில் பரிசோதிக்கப்படுவதில்லை என்ற குற்றச்சாட்டுகளும் எழுந்துள்ளன.
குறிப்பாக, மாற்றுத்திறனாளிகளுக்கான சதவீதத்தை நிர்ணயித்து மருத்துவச் சான்றிதழ் வழங்குவதிலும் சில நேரங்களில் தேவையற்ற காலதாமதம் அல்லது அலட்சியம் காட்டப்படுவதாக பொதுமக்கள் தரப்பில் புகார் தெரிவிக்கப்பட்டுள்ளது.
இதனால், உண்மையில் மாற்றுத்திறன் பாதிப்பு உள்ளவர்களுக்கு அரசின் நலத்திட்ட உதவிகள் கிடைப்பதில் பாதிப்பு ஏற்படக்கூடும் என்றும் அவர்கள் அச்சம் தெரிவித்துள்ளனர்.
உரிய பரிசோதனை அவசியம்
மருத்துவமனைக்கு வரும் நோயாளிகளின் உடல்நிலையை முழுமையாக பரிசோதித்து, அவர்களுக்கு உள்ள குறைபாடுகள் உண்மையாக கண்டறியப்பட்டு, அதற்கேற்ப மருத்துவ ஆலோசனையும் சான்றிதழும் வழங்கப்பட வேண்டும் என பொதுமக்கள் வலியுறுத்தியுள்ளனர்.
ஒரு சிலரின் அலட்சியமான செயல்பாடுகளால் ஒட்டுமொத்த அரசு மருத்துவக் கல்லூரி மருத்துவமனைக்கும் அவப்பெயர் ஏற்படும் நிலை உருவாகக் கூடாது என்றும் அவர்கள் தெரிவித்துள்ளனர்.
மாவட்ட நிர்வாகம் விசாரிக்க கோரிக்கை
இந்த குற்றச்சாட்டுகள் குறித்து விழுப்புரம் மாவட்ட நிர்வாகம் மற்றும் சுகாதாரத்துறை அதிகாரிகள் உரிய விசாரணை நடத்த வேண்டும் என்றும், சம்பந்தப்பட்ட மருத்துவப் பிரிவில் நோயாளிகளுக்கு மேற்கொள்ளப்படும் பரிசோதனை மற்றும் மாற்றுத்திறனாளி சான்றிதழ் வழங்கும் நடைமுறைகள் குறித்து ஆய்வு செய்ய வேண்டும் என்றும் பொதுமக்கள் கோரிக்கை விடுத்துள்ளனர்.
மேலும், குற்றச்சாட்டுகள் உண்மை என விசாரணையில் தெரிய வந்தால், சம்பந்தப்பட்டவர்கள் மீது துறை ரீதியான நடவடிக்கை எடுக்க வேண்டும் என்றும், இனிவரும் காலங்களில் மாற்றுத்திறனாளிகள் உள்ளிட்ட அனைத்து நோயாளிகளுக்கும் பாரபட்சமின்றி உரிய மருத்துவப் பரிசோதனை மற்றும் சிகிச்சை கிடைப்பதை உறுதி செய்ய வேண்டும் என்றும் வலியுறுத்தப்பட்டுள்ளது.
