सत्संग प्रतिष्ठानतर्फे ५०० महिलांसाठी परळी वैजनाथ दर्शनाची मोफत सेवा
लातूर : सत्संग प्रतिष्ठान लातूरच्या वतीने गेल्या ११ वर्षांची परंपरा जपत यंदाही श्रावण महिन्याचे औचित्य साधून ५०० महिलांसाठी परळी वैजनाथ दर्शनाची मोफत बससेवा तसेच अन्नदान सेवेचे आयोजन करण्यात आले आहे. लातूर शहरातील व्यापारी वर्ग आणि विविध मान्यवरांच्या सहकार्याने ही सेवा आयोजित केली जाते.
याच उपक्रमांतर्गत यंदाच्या दिवाळीत ३०० महिलांसाठी तिरुपती बालाजी दर्शनासाठी मोफत बससेवा व दर्शनसेवा देण्याचा मानस असल्याची माहिती सत्संग प्रतिष्ठानचे मधुसूदन पारीख यांनी पत्रकारांशी बोलताना दिली.
दरम्यान, मागील २६ वर्षांपासून आषाढी वारीच्या निमित्ताने पंढरपूरला जाणाऱ्या वारकरी व भाविकांसाठी दरवर्षी २५ बसेसची मोफत सेवा तसेच अन्नदान सेवा सत्संग प्रतिष्ठानच्या वतीने सातत्याने आयोजित केली जाते. धार्मिक श्रद्धेसोबतच सामाजिक बांधिलकी जपत प्रतिष्ठानचा हा सेवाभावी उपक्रम सुरू असल्याचे पारीख यांनी सांगितले.
Latur, Latur | Aug 8, 2026 
