*ভূমিকম্প, অগ্নিকাণ্ড আৰু প্ৰাথমিক চিকিৎসা বিষয়ক মক ড্ৰিল অনুষ্ঠিত*
মৰিগাঁও, ১১ ছেপ্টেম্বৰ: জিলা দুৰ্যোগ ব্যৱস্থাপনা প্ৰাধিকৰণ (DDMA), মৰিগাঁৱৰ উদ্যোগত জিলা প্ৰশাসনৰ পৃষ্ঠপোষকতাত আৰু অগ্নি আৰু জৰুৰীকালীন সেৱা কেন্দ্ৰ, মৰিগাঁৱৰ সহযোগত আজি মৰিগাঁও চহৰৰ KDR Plaza-ত ভূমিকম্প, অগ্নিকাণ্ড আৰু প্ৰাথমিক চিকিৎসা বিষয়ক এক মক ড্ৰিল সফলতাৰে অনুষ্ঠিত হয়।
দুৰ্যোগৰ সময়ত জৰুৰী সঁহাৰি ব্যৱস্থা অধিক ফলপ্ৰসূ কৰি তোলা, জনসাধাৰণৰ মাজত সজাগতা বৃদ্ধি কৰা আৰু সমন্বিত দুৰ্যোগ মোকাবিলাৰ সক্ষমতা শক্তিশালী কৰাৰ লক্ষ্যৰে এই অনুশীলনৰ আয়োজন কৰা হয়।
ভূমিকম্প বিষয়ক অনুশীলনত “Drop, Cover and Hold” পদ্ধতি, সুৰক্ষিতভাৱে স্থানত্যাগ আৰু নিৰ্ধাৰিত সমবেত স্থানলৈ সুশৃংখল স্থানান্তৰৰ প্ৰদৰ্শন কৰা হয়।
অগ্নিকাণ্ড বিষয়ক মক ড্ৰিলত অগ্নিকাণ্ডৰ সাধাৰণ কাৰণ, অগ্নি নিৰ্বাপক যন্ত্ৰৰ সঠিক ব্যৱহাৰ, প্ৰাথমিক উদ্ধাৰ কৌশল আৰু অগ্নি দুৰ্ঘটনাৰ সময়ত পালনীয় সাৱধানতাসমূহ প্ৰদৰ্শন কৰা হয়।
ইয়াৰ সমান্তৰালভাৱে চিকিৎসা দলে প্ৰাথমিক চিকিৎসা, কাৰ্ডিঅ’পালম’নেৰী ৰিচাচিটেচন (CPR) আৰু আহত ব্যক্তিক উন্নত চিকিৎসা লাভ নকৰালৈকে সঠিকভাৱে সহায় আগবঢ়োৱাৰ ব্যৱহাৰিক প্ৰদৰ্শন কৰে।
অনুষ্ঠানত সহকাৰী আয়ুক্ত তথা DDMA-ৰ শাখা বিষয়া শ্ৰীমতী অংকিতা দত্ত, ACS, DDMA-ৰ জিলা প্ৰকল্প বিষয়া শ্ৰীমতী ৰঞ্জু শৰ্মা, দুৰ্যোগ ব্যৱস্থাপনা ক্ষেত্ৰ বিষয়া, চিকিৎসা দল, যান-বাহন নিয়ন্ত্ৰণত নিয়োজিত আৰক্ষী, অগ্নি আৰু জৰুৰীকালীন সেৱাৰ কৰ্মী, ভিলেজ ডিফেন্স পাৰ্টি (চিভিল ডিফেন্স) স্বেচ্ছাসেৱক, KDR Plaza-ৰ কৰ্মচাৰী আৰু স্থানীয় ৰাইজ উপস্থিত থাকে।
জিলা দুৰ্যোগ ব্যৱস্থাপনা প্ৰাধিকৰণ, মৰিগাঁৱে জিলাজুৰি এনে সজাগতা কাৰ্যসূচী আৰু মক ড্ৰিল অব্যাহত ৰাখি দুৰ্যোগ-সচেতন, সুৰক্ষিত আৰু অধিক স্থিতিস্থাপক সমাজ গঢ়ি তোলাৰ দিশত নিৰন্তৰ প্ৰয়াস চলাই আহিছে।
Laharighat, Morigaon | Sep 11, 2026
