মৰিগাঁৱত পথ সুৰক্ষা সজাগতা ৰেলী আৰু স্বাক্ষৰ অভিযান মৰিগাঁও, ১৩ জুনঃ জিলা পথ সুৰক্ষা সমিতি, মৰিগাঁৱৰ উদ্যোগত, অতিৰিক্ত জিলা আয়ুক্ত নিতিশা বৰাৰ তত্ত্বাৱধানত আৰু মটৰহেড ইউনাইটেড মটৰচাইকেল ক্লাৱৰ সহযোগত আজি পথ সুৰক্ষাকেন্দ্ৰিক এক সজাগতা মটৰ চাইকেল ৰেলী আৰু স্বাক্ষৰ অভিযান সফলভাৱে সম্পন্ন হয়। মৰিগাঁও আৱৰ্ত ভৱনৰ সমীপৰ পৰা উলিওৱা এই মটৰচাইকেল ৰেলীৰ মূল উদ্দেশ্য আছিল সৰ্বসাধাৰণৰ মাজত পথ সুৰক্ষাৰ বিধি-নিয়ম, নিৰাপদ চালনা, হেলমেট আৰু ছিটবেল্ট ব্যৱহাৰৰ গুৰুত্ব তথা দায়িত্বশীল পথ ব্যৱহাৰৰ বিষয়ে সজাগতা বৃদ্ধি কৰা। ৰেলীটো বাচানাঘাট হৈ ১ নং মানিপুৰৰ ছপাপাৰ প্ৰাথমিক বিদ্যালয়ত উপস্থিত হয়। কাৰ্যসূচীৰ অংশ হিচাপে “মই পথ সুৰক্ষাৰ নীতি-নিয়ম মানি চলিম” শীৰ্ষক এক স্বাক্ষৰ অভিযানৰো আয়োজন কৰা হয়। চালক, শিক্ষাৰ্থী, ব্যৱসায়ী, পথচাৰীকে ধৰি বহু লোকে উৎসাহেৰে অংশগ্ৰহণ কৰি পথ সুৰক্ষাৰ প্ৰতি নিজৰ দায়বদ্ধতা প্ৰকাশ কৰে। ইয়াৰ উপৰি ছপাপাৰ প্ৰাথমিক বিদ্যালয়ত জিলা স্বাস্থ্য বিভাগৰ উদ্যোগত এক স্বাস্থ্য শিবিৰ অনুষ্ঠিত হয়। শিবিৰত সাধাৰণ স্বাস্থ্য পৰীক্ষাৰ লগতে বিশেষ চকু পৰীক্ষা শিবিৰৰো আয়োজন কৰা হয়। একে সময়তে জিলা পৰিবহণ বিভাগৰ উদ্যোগত বিভিন্ন বাহনৰ যান্ত্ৰিক পৰীক্ষা সম্পন্ন কৰি চালকসকলক যান-বাহন আইন কঠোৰভাৱে মানি চলিবলৈ আহ্বান জনায়, যাতে নিজৰ লগতে আন পথ ব্যৱহাৰকাৰীৰ সুৰক্ষা নিশ্চিত কৰিব পৰা যায়। উল্লেখ্য যে, জিলা পথ সুৰক্ষা সমিতি, মৰিগাঁৱৰ উদ্যোগত জিলাখনৰ বিভিন্ন স্থানত শেহতীয়া সময়ছোৱাত ব্যাপক পথ সুৰক্ষা সজাগতা অভিযান অব্যাহত আছে। এই ধৰণৰ কাৰ্যসূচীয়ে পথ দুৰ্ঘটনা হ্ৰাস কৰাৰ লগতে জনসাধাৰণৰ মাজত সুৰক্ষিত আৰু শৃংখলাবদ্ধ পথ ব্যৱহাৰৰ সংস্কৃতি গঢ়ি তোলাত গুৰুত্বপূৰ্ণ ভূমিকা পালন কৰি আহিছে।
Laharighat, Morigaon | Jun 13, 2026
MORE NEWS
১,৪১,৩৪৫ টি শিশুক সামৰি মৰিগাঁও জিলাত ২৮ জুনত পলিঅ' প্ৰতিষেধক প্ৰদান ৰাজ্যৰ অন্যান্য ঠাইৰ লগতে মৰিগাঁও জিলাতো অহা ২৮ জুনত ৫ বছৰ বয়সৰ তলৰ শিশুসকলক পলিঅ' প্ৰতিষেধক সেৱন কৰোৱাৰ বাবে মৰিগাঁও জিলা স্বাস্থ্য বিভাগে ব্যৱস্থা গ্ৰহণ কৰিছে। আজি এই সন্দৰ্ভত জিলা আয়ুক্তৰ কাৰ্যালয়ৰ সভাকক্ষত অতিৰিক্ত জিলা আয়ুক্ত (স্বাস্থ্য) নিতিশা বৰাৰ সভাপতিত্বত এখন বৈঠক অনুষ্ঠিত হয়। বৈঠকত বিশ্ব স্বাস্থ্য সংস্থাৰ ৰাজ্যিক স্বাস্থ্য বিষয়া ডাঃ নগেন শৰ্মাই পাৱাৰপইণ্ট প্ৰেজেন্টেশ্যনৰ সহায়ত পলিঅ' প্ৰতিষেধক প্ৰদান অভিযানৰ প্ৰস্তুতি সন্দৰ্ভত বিতংভাৱে অৱগত কৰায়। তেওঁ কয় যে নৱজাতকৰ পৰা ৫ বছৰ বয়সলৈকে মৰিগাঁও জিলাত মুঠ ১,৪১,৩৪৫ টি শিশুক এই অভিযানৰ অধীনত সামৰি লোৱা হ'ব। ২৮ জুনত জিলাখনৰ মুঠ ৯১৪ টা বুথত প্ৰতিষেধক প্ৰদান কৰা হ'ব। ২৯ জুনত তিনি হাজাৰৰো অধিক স্বাস্থ্য কৰ্মীয়ে ঘৰে ঘৰে গৈ পলিঅ' প্ৰতিষেধক প্ৰদান কৰিব। আনহাতে ২৮ তাৰিখৰ পৰা ৩০ জুনলৈকে তিনিদিন বিভিন্ন বাছ আস্থান, ৰেলৱে ষ্টেচন আদিত পলিঅ' প্ৰতিষেধক প্ৰদান কৰা হ'ব। সভাত অতিৰিক্ত জিলা আয়ুক্ত নিতিশা বৰাই প্ৰতিটো যোগ্য শিশুৱে প্ৰতিষেধক লাভ কৰাটো সুনিশ্চিত কৰাৰ বাবে সকলোকে দায়বদ্ধতাৰে কাম কৰিবলৈ আহ্বান জনায়। সভাত এইচ পি ভি টীকাকৰণ কাৰ্যসূচী সন্দৰ্ভতো আলোচনা কৰা হয়। অতিৰিক্ত জিলা আয়ুক্তগৰাকীয়ে এই টীকাকৰণক লৈ সমাজত থকা বিভিন্ন ভ্ৰান্ত ধাৰণা আৰু ভুল তথ্য, বিশেষকৈ টীকা গ্ৰহণে আন স্বাস্থ্যজনিত সমস্যাৰ সৃষ্টি কৰে বুলি চলি থকা অপপ্ৰচাৰ দূৰ কৰাৰ ওপৰত গুৰুত্ব আৰোপ কৰে। অভিভাৱক, শিক্ষক-শিক্ষয়িত্ৰী আৰু সমাজৰ সকলো স্তৰৰ মাজত অধিক সচেতনতা সৃষ্টিৰ জৰিয়তে অধিক সংখ্যক অংশগ্ৰহণ নিশ্চিত কৰাৰ বিষয়ে সভাত বিস্তৃত আলোচনা হয়।
Laharighat, Morigaon | Jun 12, 2026
সম্পূৰ্ণ অসমীয়া সাজ-পোছাকত সজ্জিত হৈ মৰিগাঁও জিলাৰ অভিভাৱক মন্ত্ৰী অজন্তা নেওগক উষ্ম আদৰণি জনালে মৰিগাঁও জিলা প্ৰশাসনে মৰিগাঁও জিলাৰ নৱনিযুক্ত অভিভাৱক মন্ত্ৰী হিচাপে দায়িত্ব গ্ৰহণ কৰাৰ পিছত আজি প্ৰথমবাৰৰ বাবে মৰিগাঁও জিলাত উপস্থিত হয় অসম চৰকাৰৰ মন্ত্ৰী অজন্তা নেওগ। তেখেতৰ আগমনৰ প্ৰাকমুহূৰ্তৰ পৰাই মৰিগাঁও জিলা আয়ুক্ত কাৰ্যালয়ত এক উৎসৱমুখৰ পৰিৱেশৰ সৃষ্টি হয়। জিলা প্ৰশাসনৰ বিষয়া-কৰ্মচাৰীসকলে সম্পূৰ্ণ অসমীয়া পৰম্পৰাগত সাজ-পোছাক পৰিধান কৰি অভিভাৱক মন্ত্ৰীগৰাকীক আন্তৰিকতাৰে আদৰণি জনায়। মন্ত্ৰী অজন্তা নেওগে জিলা আয়ুক্ত কাৰ্যালয়ৰ সভাকক্ষত অনুষ্ঠিত হোৱা এখন গুৰুত্বপূৰ্ণ পৰ্যালোচনা সভাত অংশগ্ৰহণ কৰে। নিৰ্ধাৰিত সময়ত সভাকক্ষত উপস্থিত হোৱা মন্ত্ৰীগৰাকীক মৰিগাঁও জিলাৰ জিলা আয়ুক্ত অনামিকা তেৱাৰীয়ে ফুলাম গামোচা আৰু সম্বৰ্ধনাৰে উষ্ণ অভ্যৰ্থনা জনায়। সভাকক্ষটোও বিশেষভাৱে সজাই তোলা হৈছিল, যিটো অতিথিসকলৰ দৃষ্টি আকৰ্ষণ কৰে। সভাৰ আৰম্ভণিতে জিলা আয়ুক্ত অনামিকা তেৱাৰীয়ে আদৰণি ভাষণ প্ৰদান কৰি মৰিগাঁও জিলাৰ সামগ্ৰিক চিত্ৰ, প্ৰশাসনিক কাৰ্যকলাপ, উন্নয়নমূলক আঁচনিৰ অগ্ৰগতি, শিক্ষা, স্বাস্থ্য, কৃষি, গাঁও উন্নয়ন, মহিলাৰ সবলীকৰণ আদি বিভিন্ন ক্ষেত্ৰৰ বৰ্তমান অৱস্থাৰ ওপৰত বিস্তৃত আলোকপাত কৰে। তেখেতে জিলাখনৰ উন্নয়নৰ ক্ষেত্ৰত চলি থকা বিভিন্ন পদক্ষেপ আৰু আগন্তুক পৰিকল্পনাসমূহৰ বিষয়েও মন্ত্ৰীগৰাকীক অৱগত কৰে। পৰৱৰ্তী সময়ত জিলাৰ বিভিন্ন বিভাগৰ মুৰব্বী বিষয়াসকলে নিজ নিজ বিভাগৰ কাম-কাজ, সাফল্য, চলি থকা প্ৰকল্প আৰু সন্মুখীন হৈ থকা বিভিন্ন প্ৰত্যাহ্বানৰ বিষয়ে অভিভাৱক মন্ত্ৰীগৰাকীৰ আগত উপস্থাপন কৰে। মন্ত্ৰী অজন্তা নেওগে মনোযোগ সহকাৰে সকলো বিষয় শুনি বিভাগীয় বিষয়াসকলক চৰকাৰৰ জনকল্যাণমূলক আঁচনিসমূহ অধিক গতিশীলভাৱে, স্বচ্ছতাৰে আৰু সময়মতে ৰূপায়ন কৰাৰ বাবে আহ্বান জনায়। তেখেতে কয় যে চৰকাৰৰ প্ৰতিখন আঁচনিৰ মূল লক্ষ্য হৈছে জনসাধাৰণৰ জীৱনধাৰণৰ মান উন্নত কৰা। সেয়ে আঁচনিসমূহৰ সুফল যাতে সমাজৰ অন্তিমজন লোকৰ ওচৰলৈও সঠিক সময়ত যায় তাৰ বাবে সকলো বিভাগে সমন্বয় আৰু দায়বদ্ধতাৰে কাম কৰিব লাগিব। লগতে জিলাখনৰ সামগ্ৰিক উন্নয়ন, আন্তঃবিভাগীয় সহযোগিতা আৰু জনসাধাৰণৰ সমস্যা সমাধানৰ ক্ষেত্ৰত অধিক গুৰুত্ব আৰোপ কৰিবলৈও নিৰ্দেশ দিয়ে। সভাত মৰিগাঁও সমষ্টিৰ বিধায়ক ৰমাকান্ত দেউৰী উপস্থিত থাকি বিভিন্ন উন্নয়নমূলক বিষয়ত নিজৰ মতামত আগবঢ়ায়। লাহৰীঘাট সমষ্টিৰ বিধায়ক আচিফ মহম্মদ নাজাৰেও বিভিন্ন সমস্যাৰ কথা অৱগত কৰি অভিভাৱক মন্ত্ৰীগৰাকীৰ নেতৃত্বত মৰিগাঁও জিলাই উন্নয়নৰ ক্ষেত্ৰত নতুন গতি লাভ কৰিব বুলি আশা ব্যক্ত কৰে। উল্লেখযোগ্য যে অভিভাৱক মন্ত্ৰী অজন্তা নেওগৰ এই প্ৰথম আনুষ্ঠানিক মৰিগাঁও ভ্ৰমণক কেন্দ্ৰ কৰি জিলা প্ৰশাসনৰ মাজত উৎসাহ-উদ্দীপনাৰ পৰিৱেশ বিৰাজ কৰে। সভাখনত গৃহীত বিভিন্ন সিদ্ধান্ত আৰু দিশ-নিৰ্দেশনাই আগন্তুক দিনত মৰিগাঁও জিলাৰ উন্নয়ন যাত্ৰাক অধিক শক্তিশালী কৰি তুলিব বুলি আশা প্ৰকাশ কৰা হৈছে। ইপিনে আজি অভিভাৱক মন্ত্ৰী অজন্তা নেওগক বিভিন্ন দল সংগঠনৰ লগতে বিজেপি অগপ কৰ্মী সকলে আদৰণি জনায়। মৈৰাবাৰী মন্ডল বিজেপি দলৰ কৰ্মী সকল, লাহৰীঘাট সমষ্টিৰ বিজেপি কৰ্মী আৰু মৰিগাঁও সদৰ সমষ্টিৰ বিভিন্ন জনে মন্ত্ৰী গৰাকীক গামোচা জাপিৰে সম্বৰ্ধনা জ্ঞাপন কৰে।
Laharighat, Morigaon | Jun 11, 2026
মৰিগাঁও জিলাৰ অভিভাৱক মন্ত্ৰী অজন্তা নেওগক বিপুল আদৰণি।
Laharighat, Morigaon | Jun 11, 2026
