📍📍लातूर जिल्ह्यावर दुष्काळाचे भीषण संकट; १४५ प्रकल्प मृतसाठ्यात खरीप हंगाम हातातून गेला; सोयाबीनचे १०० टक्के नुकसान, पिण्याच्या पाण्याचा प्रश्न गंभीर — आ. संभाजी पाटील निलंगेकर लातूर, दि. १२ सप्टेंबर २०२६ : लातूर जिल्ह्यात दुष्काळजन्य परिस्थिती नसून दुष्काळाचे गंभीर संकट निर्माण झाले आहे. पावसाने पाठ फिरवल्याने जिल्ह्यातील शेती व्यवस्था मोठ्या संकटात सापडली असून, खरीप हंगाम पूर्णपणे हातातून गेला आहे. सोयाबीन पिकाचे जवळपास १०० टक्के नुकसान झाले असून, शेतकऱ्यांसमोर आता आर्थिक संकट उभे ठाकले आहे. त्याचबरोबर आगामी काळात पिण्याच्या पाण्याची टंचाई निर्माण होण्याची भीतीही वाढली आहे, असे माजी मंत्री तथा भाजप आमदार संभाजी पाटील निलंगेकर यांनी सांगितले. लातूर येथे आयोजित पत्रकार परिषदेत ते बोलत होते. जिल्ह्यातील १४५ प्रकल्प मृतसाठ्यात गेल्याने उपलब्ध जलसाठा अत्यंत चिंताजनक पातळीवर पोहोचला आहे. त्यामुळे उर्वरित पाण्याचा प्रत्येक थेंब जपून वापरण्याची वेळ आली असून, शिल्लक पाणी सर्वप्रथम पिण्याच्या पाण्यासाठी राखीव ठेवावे, अशी मागणी शासनाकडे करण्यात आली आहे. या मागणीच्या अनुषंगाने शासनाने आवश्यक पावले उचलण्यास सुरुवात केली असल्याचे निलंगेकर यांनी स्पष्ट केले. शेतकऱ्यांवर दुहेरी संकट पावसाअभावी सोयाबीनसह खरीप पिकांचे मोठ्या प्रमाणात नुकसान झाले आहे. पिके हातातून गेल्याने शेतकऱ्यांचे उत्पादन तर बुडालेच, पण पुढील हंगामासाठी लागणारे भांडवल, कर्जफेड आणि कुटुंबाचा उदरनिर्वाह यांचेही मोठे आव्हान शेतकऱ्यांसमोर उभे राहिले आहे. नुकसानग्रस्त क्षेत्राचे पंचनामे सुरू करण्यात आले असून, शेतकऱ्यांना योग्य आणि पुरेशी मदत मिळावी यासाठी शासन सकारात्मक असल्याचे निलंगेकर यांनी सांगितले. पिण्याच्या पाण्याची चिंता वाढली शेतीसोबतच दुष्काळाचा सर्वाधिक परिणाम पिण्याच्या पाण्यावर होण्याची शक्यता आहे. जलसाठे मृतसाठ्यात गेल्याने भविष्यात ग्रामीण तसेच शहरी भागातील पाणीपुरवठ्यावर परिणाम होऊ शकतो. त्यामुळे उपलब्ध पाण्याचे काटेकोर नियोजन आणि पिण्याच्या पाण्याला सर्वोच्च प्राधान्य देणे आवश्यक असल्याचे निलंगेकर यांनी नमूद केले. शाश्वत पाण्यासाठी वॉटर ग्रीड लातूर आणि धाराशिव जिल्ह्याला भविष्यातील पाणी संकटापासून कायमस्वरूपी दिलासा देण्यासाठी वॉटर ग्रीड प्रकल्पाचे काम सुरू आहे. मात्र सध्याचे दुष्काळाचे संकट तातडीने हाताळण्याची गरज आहे. शेतकरी, नागरिक आणि ग्रामीण अर्थव्यवस्थेवर होणारा परिणाम लक्षात घेऊन शासनाने मदत व उपाययोजनांना वेग द्यावा, अशी अपेक्षा त्यांनी व्यक्त केली. दुष्काळाच्या या गंभीर परिस्थितीत सर्व लोकप्रतिनिधींनी राजकीय मतभेद बाजूला ठेवून एकत्रितपणे काम करण्याची गरज आहे. लातूर जिल्ह्याला या दुष्काळाच्या संकटातून बाहेर काढण्यासाठी सर्व लोकप्रतिनिधी मिळून प्रयत्न करणार, असा विश्वासही आमदार संभाजी पाटील निलंगेकर यांनी महाराष्ट्र न्यूजशी बोलताना व्यक्त केला.

Latur, Latur | Sep 12, 2026

MORE NEWS