हिंदू लिंगायत समाजाचा 'अमृत' संस्थेत समावेश; शिवा संघटनेच्या पाठपुराव्याला यश
लातूर (प्रतिनिधी) : महाराष्ट्रातील खुल्या प्रवर्गातील नागरिकांसाठी असलेल्या महाराष्ट्र संशोधन, उन्नती व प्रशिक्षण प्रबोधिनी (अमृत) संस्थेच्या लाभार्थी यादीत आता 'हिंदू लिंगायत' आणि 'वीरशैव लिंगायत' या दोन जातींचा समावेश करण्यात आला आहे. यामुळे ओबीसी आरक्षणाचा लाभ न मिळणाऱ्या या समाजबांधवांना शासनाच्या विविध योजनांचा लाभ घेता येणार आहे.
शिवा संघटनेचे संस्थापक अध्यक्ष प्रा. मनोहर धोंडे यांनी लातूर येथील विश्रामगृहावर आयोजित पत्रकार परिषदेत ही माहिती दिली. यावेळी त्यांनी सांगितले की, अनेक हिंदू लिंगायत बांधवांच्या दाखल्यावर जात नमूद असूनही त्यांना ओबीसी आरक्षण मिळत नव्हते, त्यामुळे महाज्योती किंवा महात्मा बसवेश्वर महामंडळाच्या योजनांचा लाभ मिळत नव्हता. शिवा संघटनेने सातत्याने पाठपुरावा केल्यानंतर शासनाने 20 ऑगस्ट 2026 रोजी निर्णय काढून या दोन्ही जातींचा अमृतमध्ये समावेश केला आहे.
प्रा. धोंडे यांनी सांगितले की, अमृत संस्थेची स्थापना 22 ऑगस्ट 2022 रोजी झाली असून यापूर्वी यात 22 जाती होत्या. आता अमृतच्या माध्यमातून 100 पेक्षा अधिक योजना उपलब्ध आहेत. यात IIT, IIM, AIIMS तसेच परदेशातील उच्च शिक्षणासाठी 50 लाखांपर्यंत बिनव्याजी शैक्षणिक कर्ज, UPSC-MPSC स्पर्धा परीक्षा तयारीसाठी आर्थिक सहाय्य, तसेच AI, कौशल्य विकास आणि स्टार्टअपसाठी विविध योजना आहेत. अमृत संस्थेच्या 100+ योजनांचा मिळणार लाभ
*Tags:* Hindu Lingayat, Amrut Sanstha, Shiva Sanghatna, Manohar Dhonde, Latur News
Latur, Latur | Sep 22, 2026 
