ଜୟପୁର ଉପଖଣ୍ଡ ସ୍ତରୀୟ ମୋବାଇଲ ମେଳା : ୧୧୦ ହଜିଥିବା ମୋବାଇଲ ଉଦ୍ଧାର, ପ୍ରକୃତ ମାଲିକଙ୍କୁ ହସ୍ତାନ୍ତର ଜୟପୁର ଏସଡିପିଓ କାର୍ଯ୍ୟାଳୟ ପରିସରରେ ବୁଧବାର ଉପଖଣ୍ଡ ସ୍ତରୀୟ ମୋବାଇଲ ମେଳା ଅନୁଷ୍ଠିତ ହୋଇଥିଲା। ଜୟପୁର ଏସଡିପିଓ କୁମାରୀ ଅର୍ଚ୍ଚିତା ମିତ୍ତଲଙ୍କ ଅଧ୍ୟକ୍ଷତାରେ ଆୟୋଜିତ ଏହି ମେଳାରେ ଜୟପୁର ଟାଉନ, ଜୟପୁର ସଦର, ବୈପାରିଗୁଡ଼ା ଓ କୁନ୍ଦୁରା ଥାନା ଅଞ୍ଚଳରୁ ହଜିଯାଇଥିବା ପ୍ରାୟ ୧୧୦ଟି ମୋବାଇଲ ଫୋନ ଉଦ୍ଧାର କରାଯାଇ ପ୍ରକୃତ ମାଲିକମାନଙ୍କୁ ହସ୍ତାନ୍ତର କରାଯାଇଥିଲା। ଉଦ୍ଧାର ହୋଇଥିବା ମୋବାଇଲ ମଧ୍ୟରୁ ଜୟପୁର ଟାଉନ ଥାନା ଅଞ୍ଚଳରୁ ସର୍ବାଧିକ ୫୦ଟି ମୋବାଇଲ ଉଦ୍ଧାର ହୋଇଥିବା ବେଳେ ଅନ୍ୟାନ୍ୟ ମୋବାଇଲ ଜୟପୁର ସଦର, ବୈପାରିଗୁଡ଼ା ଓ କୁନ୍ଦୁରା ଥାନା ଅଞ୍ଚଳରୁ ଠାବ କରାଯାଇଥିଲା। ବିଭିନ୍ନ ସ୍ଥାନରେ ମୋବାଇଲ ହଜିଯିବା ପରେ ମାଲିକମାନେ ସମ୍ପୃକ୍ତ ଥାନା ଏବଂ ସଞ୍ଚାର ସାଥୀ (ସିଇଆଇଆର୍) ପୋର୍ଟାଲ ମାଧ୍ୟମରେ ଅନଲାଇନ୍ ଜିଡି ଏଣ୍ଟ୍ରି କରି ଅଭିଯୋଗ ଦାଖଲ କରିଥିଲେ। ସେହି ଅଭିଯୋଗ ଆଧାରରେ ପୋଲିସ ତଦନ୍ତ ଆରମ୍ଭ କରି ପ୍ରାୟ ଦୁଇ ମାସର ପ୍ରୟାସ ପରେ ୧୧୦ଟି ମୋବାଇଲ ଫୋନ ଉଦ୍ଧାର କରିବାରେ ସଫଳ ହୋଇଛି।ଏସଡିପିଓ କୁମାରୀ ଅର୍ଚ୍ଚିତା ମିତ୍ତଲ ଗଣମାଧ୍ୟମକୁ ସୂଚନା ଦେଇ କହିଥିଲେ ଯେ, ମୋବାଇଲ ହଜିଗଲେ ବିଳମ୍ବ ନକରି ସଞ୍ଚାର ସାଥୀ (ସିଇଆଇଆର୍) ପୋର୍ଟାଲରେ ଅଭିଯୋଗ ପଞ୍ଜୀକରଣ କରିବା ସହ ସମ୍ପୃକ୍ତ ଥାନାରେ ଜିଡି କଲେ ପୋଲିସ ପାଇଁ ମୋବାଇଲ ଟ୍ରାକ୍ କରିବା ଓ ଉଦ୍ଧାର କରିବା ସହଜ ହୋଇଥାଏ। ମୋବାଇଲ ମେଳାରେ ଜୟପୁର ଟାଉନ, ଜୟପୁର ସଦର, ବୈପାରିଗୁଡ଼ା ଓ କୁନ୍ଦୁରା ଥାନାର ଅଧିକାରୀ ଏବଂ କର୍ମଚାରୀମାନେ ଉପସ୍ଥିତ ଥିଲେ। ଦୀର୍ଘଦିନ ପରେ ନିଜ ହଜିଯାଇଥିବା ମୋବାଇଲ ଫେରିପାଇ ଉପସ୍ଥିତ ମାଲିକମାନେ ପୋଲିସର ଏହି ସଫଳ ପଦକ୍ଷେପକୁ ଭୂୟସୀ ପ୍ରଶଂସା କରିଥିଲେ।