*जागतिक फार्मासिस्ट दिन उत्साहात साजरा; जीपॅट व नायपर-जेईई यशस्वी विद्यार्थ्यांचा पालकांसह गौरव*
निलंगा : महाराष्ट्र कॉलेज ऑफ फार्मसी, महाराष्ट्र पॉलिटेक्निक (डी.फार्म) इन्स्टिट्यूट आणि निलंगा तालुका केमिस्ट अँड ड्रगिस्ट असोसिएशन यांच्या संयुक्त विद्यमाने जागतिक फार्मासिस्ट दिन व राष्ट्रीय फार्मसी सप्ताह-२०२६ विविध शैक्षणिक व सामाजिक उपक्रमांनी उत्साहात साजरा करण्यात आला.
कार्यक्रमास प्रमुख पाहुणे म्हणून महाराष्ट्र शिक्षण समितीचे प्रतिनिधी पृथ्वीराज विजय पाटील निलंगेकर, महाराष्ट्र कॉलेज ऑफ फार्मसीचे प्राचार्य डॉ. एस. एस. पाटील, महाराष्ट्र पॉलिटेक्निकचे प्राचार्य डॉ. बी. एन. पौळ, महाराष्ट्र विद्यालयाचे माजी मुख्याध्यापक मोहन नटवे, लातूर जिल्हा केमिस्ट अँड ड्रगिस्ट असोसिएशनचे उपाध्यक्ष ओम बाहेती, तालुका अध्यक्ष बालाजी थेटे यांच्यासह पंकज शेळके, सोमनाथ आग्रे, राजेंद्र धूत, हंसराज शिंदे, किशन बाहेती, बाबुआप्पा महाजन, ओम आग्रे, विकास सोळंके, सतीश चाकोते, अभिषेक गडीकर, गुरुनाथ सूर्यवंशी आदी मान्यवर उपस्थित होते.
*जनजागृती रॅली व फार्मासिस्ट शपथ:* फार्मासिस्टची आरोग्य सेवेतील महत्त्वपूर्ण भूमिका आणि समाजातील योगदान याबाबत जनजागृती करण्यासाठी निलंगा शहरातून भव्य जनजागृती रॅली काढण्यात आली. या रॅलीत विद्यार्थी, प्राध्यापक, फार्मासिस्ट व असोसिएशनचे पदाधिकारी मोठ्या संख्येने सहभागी झाले होते. विद्यार्थ्यांनी औषधांचा योग्य व सुरक्षित वापर, प्रतिजैविकांचा जबाबदारीने वापर आणि फार्मसीची सामाजिक जबाबदारी याबाबत जनजागृती केली. यावेळी डॉ. सी. व्ही. पांचाळ यांनी सर्व विद्यार्थ्यांना फार्मासिस्टची शपथ दिली. आरोग्य सेवेसोबतच पर्यावरण संवर्धनाचा संदेश देण्यासाठी मान्यवरांचा रोपटे देऊन सत्कार करण्यात आला व महाविद्यालयाच्या प्रांगणात वृक्षारोपण करण्यात आले.
*यशस्वी विद्यार्थ्यांचा गौरव:*
जागतिक फार्मासिस्ट दिनाचे औचित्य साधून जीपॅट (GPAT) व नायपर-जेईई (NIPER JEE) २०२६ या राष्ट्रीय स्तरावरील परीक्षेत यश संपादन केलेल्या विद्यार्थ्यांचा व त्यांच्या पालकांचा सत्कार करण्यात आला. जीपॅट-२०२६ मध्ये प्रथम, द्वितीय व तृतीय क्रमांक पटकावणाऱ्या विद्यार्थ्यांना संस्थेचे संस्थापक अध्यक्ष व माजी मुख्यमंत्री स्व. डॉ. शिवाजीराव पाटील निलंगेकर यांच्या स्मरणार्थ रोख रक्कम, प्रशस्तीपत्र, शाल, पुष्पगुच्छ व सन्मानचिन्ह देऊन गौरविण्यात आले. तर नायपर जेईई-२०२६ मधील यशस्वी विद्यार्थ्यांना केमिस्ट अँड ड्रगिस्ट असोसिएशन, निलंगा यांच्यावतीने प्रशस्तीपत्र व सन्मानचिन्ह देऊन सत्कार करण्यात आला. यामध्ये कु. श्रुती बैनगिरे, एजाज शेख, निकिता स्वामी, सोमेश ठाकरे, गुरुनाथ शेळके, देवानंद जाधव, श्रद्धा बैनगिरे, ऋतुजा भांडे, सुदर्शन शिंदे, सोनक कुमार आणि ओंकार बारहाले या विद्यार्थ्यांना सन्मानित करण्यात आले. कार्यक्रमाचे सूत्रसंचालन व आभार प्रा. एस. एन. पंचभाई यांनी मानले.
Latur, Latur | Sep 27, 2026 
