उदगीर-जळकोटमध्ये दुष्काळ जाहीर; आ. संजय बनसोडे यांच्या पाठपुराव्याला यश
खरीप २०२६ मधील पावसाच्या खंडामुळे शेतकऱ्यांना दिलासा; दुष्काळी उपाययोजना लागू
उदगीर : सन २०२६ च्या खरीप हंगामात अपुऱ्या पर्जन्यमानामुळे आणि पावसाच्या दीर्घ खंडामुळे शेतकरी मोठ्या संकटात सापडले आहेत. या पार्श्वभूमीवर राज्य शासनाने दुष्काळाच्या निकषानुसार Trigger-1 (प्रथम कळ) लागू झालेल्या राज्यातील २६५ तालुक्यांमध्ये दुष्काळ जाहीर करण्याचा निर्णय घेतला आहे. यामध्ये उदगीर व जळकोट तालुक्यांचाही समावेश करण्यात आला आहे.
यंदाच्या खरीप हंगामात उदगीर व जळकोट तालुक्यात समाधानकारक पाऊस झाला नसल्याने सोयाबीन, तूर, मूग, उडीद, कापूस आदी पिकांवर मोठा परिणाम झाला आहे. अनेक भागांत पावसाचा दीर्घ खंड पडल्याने पिकांची वाढ खुंटली असून शेतकऱ्यांना मोठ्या आर्थिक नुकसानीला सामोरे जावे लागत आहे.
या गंभीर परिस्थितीची दखल घेत माजी मंत्री आमदार संजय बनसोडे यांनी शासन स्तरावर सातत्याने पाठपुरावा केला. उदगीर-जळकोट तालुक्यातील शेतकऱ्यांना दुष्काळी मदत मिळावी यासाठी त्यांनी राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे यांच्याकडे सातत्याने मागणी केली होती. शेतकऱ्यांच्या नुकसानीची वस्तुनिष्ठ पाहणी व पंचनामे करून तातडीने मदत देण्याबाबत त्यांनी प्रशासन व शासनाचे लक्ष वेधले होते.
आ. संजय बनसोडे यांच्या या सातत्यपूर्ण पाठपुराव्यामुळे उदगीर व जळकोट तालुक्यांचा दुष्काळग्रस्त तालुक्यांमध्ये समावेश झाल्याने शेतकरी वर्गाला मोठा दिलासा मिळाला आहे.
*विविध सवलती व उपाययोजनांचा मार्ग मोकळा*
दुष्काळ जाहीर झाल्यानंतर संबंधित तालुक्यांमध्ये शासनाच्या दुष्काळी निकषांनुसार पीक नुकसानीचे पंचनामे, पाणीटंचाई निवारण, जनावरांसाठी चारा व पिण्याच्या पाण्याची व्यवस्था, तसेच शेतकऱ्यांना उपलब्ध असलेल्या विविध सवलतींची अंमलबजावणी केली जाणार आहे.
शासनाकडून दुष्काळी भागातील नुकसानीचे प्रत्यक्ष मूल्यांकन करून पुढील मदत देण्याची कार्यवाही सुरू करण्यात आली आहे.
दरम्यान, उदगीर-जळकोट तालुक्यांचा दुष्काळी तालुक्यांमध्ये समावेश केल्याबद्दल माजी मंत्री आ. संजय बनसोडे यांनी मुख्यमंत्री देवेंद्र फडणवीस व उपमुख्यमंत्री एकनाथ शिंदे यांचे आभार मानले असून, शासनाने दुष्काळी उपाययोजनांची प्रभावी अंमलबजावणी करून नुकसानग्रस्त शेतकऱ्यांपर्यंत मदत पोहोचवली जाईल, असे त्यांनी सांगितले.
Latur, Latur | Sep 26, 2026 
