સુરત: ધી સુટેક્ષ કો-ઓપરેટિવ બેંક લિમિટેડ સાથે સંકળાયેલા શ્રી કમલવિજય તુલસિયાનની બેંકિંગ ક્ષેત્રમાં ૫૦ વર્ષની ગૌરવપૂર્ણ સફર પૂર્ણ થવાના અવસરે વિશેષ કાર્યક્રમનું આયોજન કરવામાં આવ્યું હતું. આ પ્રસંગે તેમના કાર્ય પ્રત્યેના સમર્પણ, નિષ્ઠા અને સંસ્થાકીય યોગદાનને બિરદાવતાં ‘શ્રી કમલવિજય તુલસિયાન ઓડિટોરિયમ’નું ઉદ્ઘાટન તેમના જ વરદ હસ્તે કરવામાં આવ્યું હતું.
શ્રી કમલવિજય તુલસિયાનની પાંચ દાયકાની કાર્યસફર સતત મહેનત, જવાબદારી, અનુભવ અને કાર્ય પ્રત્યેની અડગ નિષ્ઠાનું પ્રતીક છે. સહકારી બેંકિંગ ક્ષેત્રમાં ૫૦ વર્ષનું યોગદાન તેમની લાંબા ગાળાની કાર્યપ્રતિબદ્ધતા અને સંસ્થા પ્રત્યેના સમર્પણને પ્રતિબિંબિત કરે છે.
આ પ્રસંગે શ્રી નિર્મલભાઈ (જેઠાભાઈ) વખારીયા, શ્રી નિમેષભાઈ બચકાણીવાલા, શ્રી અશ્વિનભાઈ દેસાઈ, ડૉ. દક્ષેશ ઠાકર, શ્રી જીતુભાઈ વખારીયા, શ્રી રવીન્દ્રભાઈ ધોરાભાઈ, શ્રી શરદચંદ્ર કાપડિયા તથા શ્રી પ્રભાતસિંહ સોલંકી વતી શ્રી જયરાજસિંહ સોલંકીએ પોતાના વક્તવ્યો દ્વારા કમલવિજય તુલસિયાનને અભિનંદન અને શુભેચ્છાઓ પાઠવી હતી.
વક્તાઓએ કમલભાઈ સાથેના પોતાના અનુભવો અને વર્ષો જૂના સંસ્મરણો વાગોળતાં તેમની કાર્યનિષ્ઠા, આગવી વિચારશક્તિ, સમર્પણભાવ તથા લોકો સાથે આત્મીય સંબંધો જાળવી રાખવાની વિશેષતાને બિરદાવી હતી. તેમણે જણાવ્યું હતું કે પાંચ દાયકાની કાર્યસફર માત્ર વ્યક્તિગત સિદ્ધિ નથી, પરંતુ વર્ષોની મહેનત, અનુભવ, વિશ્વાસ અને જવાબદારીનું પરિણામ છે. આ સફરમાં તેમનાં ધર્મપત્ની શ્રીમતી પ્રેમિલાબેન તુલસિયાનના સાથ-સહકારને પણ મહત્વપૂર્ણ ગણાવવામાં આવ્યો હતો.
કાર્યક્રમનું મુખ્ય આકર્ષણ ‘શ્રી કમલવિજય તુલસિયાન ઓડિટોરિયમ’નું ઉદ્ઘાટન રહ્યું હતું. આ ઓડિટોરિયમ ભવિષ્યમાં વિવિધ બેઠકો, સભાઓ, શૈક્ષણિક કાર્યક્રમો, ચર્ચાસત્રો અને સામાજિક પ્રવૃત્તિઓ માટે ઉપયોગી બનશે. સાથે જ, તે શ્રી કમલવિજય તુલસિયાનના યોગદાનની યાદને જીવંત રાખવાની સાથે આવનારી પેઢીઓને સમર્પણ, કાર્યનિષ્ઠા અને સામાજિક પ્રતિબદ્ધતાની પ્રેરણા આપશે.
સુટેક્ષ કો-ઓપરેટિવ બેંકની આ ઉજવણી સહકારી ભાવના, વિશ્વાસ અને વર્ષો જૂના સંબંધોની ગરિમાને બિરદાવતો યાદગાર પ્રસંગ બની રહી હતી. કાર્યક્રમમાં ઉપસ્થિત મહાનુભાવો, બેંકના સભાસદો અને શુભેચ્છકોએ કમલભાઈને હૃદયપૂર્વક અભિનંદન પાઠવી તેમના સ્વસ્થ, સુખી અને દીર્ઘાયુષ્યપૂર્ણ જીવન માટે શુભકામનાઓ વ્યક્ત કરી હતી.
#krantisamaynews #krantisamay #surat #suratcity
Udhna, Surat | Oct 19, 2026 
