#ସୁବର୍ଣ୍ଣପୁର_ଜିଲ୍ଲାର_ନୂଆ_ଜିଲ୍ଲାପାଳ_ଦେବାଶିଷ_ସିଂ
ସୁବର୍ଣ୍ଣପୁର ଜିଲ୍ଲାପାଳ କିଏ ହେବ ତାକୁ ନେଇ ନାନା କଳ୍ପନାଜଳ୍ପନା ଦେଖା ଦେଇଥିଲା। କାରଣ, ପୂର୍ବତନ ଜିଲ୍ଲାପାଳ ଡ.ନୃପରାଜ ସାହୁ ଯେଉଁ ଭଳି ଜିଲ୍ଲାରେ କାମ କରିଥିଲେ, ସେହି ଅନୁସାରେ ଜଣେ ଉତ୍ତରାଧିକାରୀ ବାଛିବାକୁ ରାଜ୍ୟ ସରକାରଙ୍କୁ ମାସେ ଲାଗିଗଲା। ୨ ଦିନ ତଳେ କଂଗ୍ରେସ ପକ୍ଷରୁ ଏଫଆଇଆର୍ ପ୍ରସଙ୍ଗରେ ଜିଲ୍ଲାପାଳ କାର୍ଯ୍ୟାଳୟ ଘେରାଉ ବେଳେ ଜିଲ୍ଲାପାଳ କାହାନ୍ତି ବୋଲି ପ୍ରଶ୍ନ ଉଠିଥିଲା। ମାସେ ହେଇଗଲା ଜିଲ୍ଲାରେ ଜଣେ ନେତୃତ୍ବ ନେଉଥିବା ଜିଲ୍ଲା ମୁଖ୍ୟ ନଥିବାରୁ ସରକାରଙ୍କୁ ସମାଲୋଚନାର ଶିକାର ହେବାକୁ ପଡୁଥିଲା। ଏହିକ୍ରମରେ ସାଧାରଣ ପ୍ରଶାସନ ଓ ଅଭିଯୋଗ ବିଭାଗରେ ଅତିରିକ୍ତ ସଚିବ ଭାବେ କାର୍ଯ୍ୟରତ ଦେବାଶିଷ ସିଂ(ଆଇଏଏସ-୨୦୧୫ ବ୍ୟାଚ)ଙ୍କୁ ସୁବର୍ଣ୍ଣପୁର ଜିଲ୍ଲାପାଳ ଭାବେ ନିଯୁକ୍ତି ମିଳିଛି। ଖୋଦ୍ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ କାର୍ଯ୍ୟାଳୟରୁ ଏହି ନିଯୁକ୍ତି ନେଇ ସୂଚନା ମିଳିଛି। ନୂଆ ଜିଲ୍ଲାପାଳ ଶ୍ରୀ ସିଂଙ୍କୁ ନେଇ ଜିଲ୍ଲାବାସୀ ସ୍ବାଭାବିକ ଭାବେ ଅନେକ ଆଶା କରିବେ। କେତେଦୂର ଜିଲ୍ଲାର ୨ ନିର୍ବାଚନମଣ୍ଡଳୀର ବିକାଶ, ଦୀର୍ଘଦିନରୁ ବନ୍ଦ ପଡିଥିବା ବିକାଶ ପ୍ରକଳ୍ପକୁ ତ୍ବରାନ୍ବିତ କରିବେ ଓ ଚାଷୀଙ୍କ ଧାନ କିଣା ସମସ୍ୟା ସହ ରାଜନୈତିକ ହସ୍ତକ୍ଷେପକୁ କେମିତି ପରିଚାଳନା କରିବେ ତା’ ଉପରେ ଅନେକଙ୍କ ନଜର ରହିଛି। ଅନ୍ୟପଟେ ସଦ୍ୟ ଅନ୍ୟ ଜିଲ୍ଲା ଓ କାରଖାନାର ଶିଳ୍ପ ପାଉଁଶ ପକାଇବା ପାଇଁ ସୋନପୁର ଜିଲ୍ଲାର ୨୦ ଏକରରୁ ଅଧିକ ଜମି ଦେଇଥିବା ନେଇ ଉଠିଥିବା ବିବାଦର କେମିତି ସମାଧାନ କରିବେ ତା’ ଉପରେ ସମସ୍ତଙ୍କ ନଜର ରହିଛି। ଏଥିସହିତ ବିଜେପି-ବିଜେଡି ରାଜନୀତି ମଧ୍ୟରେ ସମନ୍ୱୟ ରଖି ଦାୟିତ୍ବ ପରିଚାଳନା କରିବେ ନା ଅତିଷ୍ଠ ହୋଇଯିବେ; ତାହାର ଉତ୍ତର ଶ୍ରୀ ସିଂ ଦାୟିତ୍ବ ଗ୍ରହଣ ପରେ ପରେ ଜଣାପଡିବ ବୋଲି ଆଲୋଚନା ଆରମ୍ଭ ହେଲାଣି। ସୁବର୍ଣ୍ଣପୁର ଜିଲ୍ଲାବାସୀ ନୂଆ ଜିଲ୍ଲାପାଳ ଶ୍ରୀ ସିଂଙ୍କ ଆଗମନକୁ ଅପେକ୍ଷା କରିଥିବାବେଳେ ଜିଲ୍ଲା ପ୍ରତି ତାଙ୍କ ଦୃଷ୍ଟିଭଙ୍ଗୀ କେମିତି ତା’ହା ଜାଣିବାକୁ ଅନେକଙ୍କ ମଧ୍ୟରେ ଉତ୍ସୁକତା ରହିଛି।
