ଭଦ୍ରକ: ଇଡି ଚଢ଼ାଉ ପରେ ମୁହଁ ଖୋଲିଲେ ଅମୂଲ୍ୟ ରତ୍ନ ନନ୍ଦ
ଘରୁ ସୁନା କିମ୍ବା ବେନାମୀ ସମ୍ପତ୍ତି ମିଳିନାହିଁ, ସୋସିଆଲ ମିଡିଆରେ ପ୍ରଚାରିତ ଖବରକୁ ମିଥ୍ୟା କହିଲେ ।
ଭଦ୍ରକ: ଇଡି (ପ୍ରବର୍ତ୍ତନ ନିର୍ଦ୍ଦେଶାଳୟ) ପକ୍ଷରୁ ଅତର୍କିତ ଚଢ଼ାଉ ପରେ ନିଜ ପକ୍ଷ ରଖିଛନ୍ତି ଅମୂଲ୍ୟ ରତ୍ନ ନନ୍ଦ। ତାଙ୍କ ଘରେ ହୋଇଥିବା ତଦନ୍ତକୁ ନେଇ ସୋସିଆଲ ମିଡିଆରେ ବିଭିନ୍ନ ଗୁଜବ ପ୍ରଚାର ହେଉଥିବାବେଳେ ଏହାକୁ ସେ ସମ୍ପୂର୍ଣ୍ଣ ମିଥ୍ୟା ଓ ଭିତ୍ତିହୀନ ବୋଲି କହିଛନ୍ତି।
ତାଙ୍କ କହିବା ଅନୁଯାୟୀ, ପଶ୍ଚିମବଙ୍ଗର ବାଙ୍କୁରା ଜିଲ୍ଲା ବିଷ୍ଣୁପୁର ଅଞ୍ଚଳର ଅମିତ ମଣ୍ଡଳ ନାମକ ଜଣେ ବ୍ୟକ୍ତି ଇଣ୍ଡିଆନ୍ ଷ୍ଟକ୍ ମାର୍କେଟରେ ଟ୍ରେଡିଂ କରୁଥିଲେ। ସେ ବିଭିନ୍ନ ବ୍ୟକ୍ତିଙ୍କଠାରୁ ପିଡିସି ଚେକ୍ ଓ ଚୁକ୍ତିନାମା ମାଧ୍ୟମରେ ଅର୍ଥ ନେଇ ନିଜ ଆକାଉଣ୍ଟରେ ଟ୍ରେଡିଂ କରୁଥିଲେ। ଏହା ବଦଳରେ ପ୍ରତିମାସରେ କିଛି ଲାଭାଂଶ ଦେବାକୁ ମଧ୍ୟ ପ୍ରତିଶ୍ରୁତି ଦେଇଥିଲେ। ପ୍ରଥମେ କିଛିଦିନ ଲାଭାଂଶ ଦେଇଥିଲେ ମଧ୍ୟ ପରବର୍ତ୍ତୀ ସମୟରେ ମାର୍କେଟରେ କ୍ଷତି ହେବାରୁ ଜମାକାରୀଙ୍କ ଅର୍ଥ ଫେରସ୍ତ କରିପାରି ନଥିଲେ।
ଏହି ଘଟଣାକୁ ନେଇ ଅଭିଯୋଗ ହେବା ପରେ ଇଡି ତଦନ୍ତ ଆରମ୍ଭ କରିଥିଲା ଏବଂ ଅମିତ ମଣ୍ଡଳଙ୍କୁ ଗିରଫ କରାଯାଇଥିଲା। ତଦନ୍ତର ଅଂଶସ୍ୱରୂପ ଅମିତ ମଣ୍ଡଳଙ୍କ ଆକାଉଣ୍ଟରୁ କେଉଁ କେଉଁ ବ୍ୟକ୍ତିଙ୍କ ଆକାଉଣ୍ଟକୁ କେତେ ଟଙ୍କା ଯାଇଛି ଏବଂ କେତେ ଟଙ୍କା ଫେରସ୍ତ ହୋଇଛି, ସେ ସମ୍ପର୍କରେ ତଥ୍ୟ ସଂଗ୍ରହ ପାଇଁ ଇଡି ତାଙ୍କ ଘରେ ସର୍ଚ୍ଚ ୱାରେଣ୍ଟ ବଳରେ ଚଢ଼ାଉ କରିଥିଲା।
ଅମୂଲ୍ୟ ରତ୍ନ ନନ୍ଦ କହିଛନ୍ତି ଯେ, ଚଢ଼ାଉ ସମୟରେ ତାଙ୍କ ଘରୁ କୌଣସି ସୁନା, ଜମିଜମା ସମ୍ପର୍କିତ ଆପତ୍ତିଜନକ ତଥ୍ୟ କିମ୍ବା ବେନାମୀ ସମ୍ପତ୍ତି ମିଳିନାହିଁ। ତଦନ୍ତକାରୀ ଅଧିକାରୀମାନେ ତାଙ୍କର ଚାରୋଟି ଡାଏରୀ ନେଇଥିବାବେଳେ ସେଥିରୁ ଦୁଇଟିରେ ତାଙ୍କର ବ୍ୟବସାୟିକ ହିସାବପତ୍ର ରହିଥିବା ସେ କହିଛନ୍ତି। ତାଙ୍କ ଆକାଉଣ୍ଟକୁ ଅମିତ ମଣ୍ଡଳଙ୍କ ଆକାଉଣ୍ଟରୁ ଟଙ୍କା ଆସିଥିବାରୁ ଆର୍ଥିକ କାରବାରର ସତ୍ୟତା ଯାଞ୍ଚ ପାଇଁ ଇଡି ଆସିଥିବା ତାଙ୍କୁ ଜଣାଇଥିଲା ବୋଲି ସେ ପ୍ରକାଶ କରିଛନ୍ତି।
ସେ ଆହୁରି କହିଛନ୍ତି ଯେ, ତାଙ୍କ ନାମରେ ଇଣ୍ଡିଆନ୍ ବ୍ୟାଙ୍କରେ କୌଣସି ଆକାଉଣ୍ଟ ନାହିଁ। ସେହିପରି ସୋସିଆଲ ମିଡିଆରେ ତାଙ୍କ ନାମରେ ଫାର୍ମହାଉସ୍ ଥିବା ନେଇ ଯେଉଁ ପ୍ରଚାର ହେଉଛି, ତାହା ମଧ୍ୟ ଭୁଲ୍। ଉକ୍ତ ଫାର୍ମହାଉସ୍ ତାଙ୍କ ବାପାଙ୍କ ନାମରେ ରହିଛି ବୋଲି ସେ ସ୍ପଷ୍ଟ କରିଛନ୍ତି।
କୋଟି କୋଟି ଟଙ୍କାର ଅନିୟମିତତା ସହ ତାଙ୍କୁ ଯୋଡ଼ି ଯେଉଁ ଆଲୋଚନା ହେଉଛି, ତାହାକୁ ମଧ୍ୟ ସେ ଖଣ୍ଡନ କରିଛନ୍ତି। ତାଙ୍କ କହିବା ଅନୁଯାୟୀ, ସେ ନିଜର ଅର୍ଥ ପିଡିସି ଚେକ୍ ଓ ଚୁକ୍ତିନାମା ମାଧ୍ୟମରେ ଅମିତ ମଣ୍ଡଳଙ୍କୁ ଦେଇଥିଲେ। ଏହା ବଦଳରେ ତାଙ୍କ ଆକାଉଣ୍ଟକୁ ଆସିଥିବା ଅର୍ଥ ଉପରେ ମଧ୍ୟ ନିୟମ ଅନୁଯାୟୀ ଟ୍ୟାକ୍ସ ପୈଠ କରାଯାଇଛି ବୋଲି ସେ ଦାବି କରିଛନ୍ତି।
ଶେଷରେ ସେ କହିଛନ୍ତି, ଇଡିର ତଦନ୍ତକୁ ସେ ସମ୍ମାନ କରୁଛନ୍ତି ଏବଂ ଆଗାମୀ ଦିନରେ ତଦନ୍ତକାରୀ ସଂସ୍ଥା ଯେକୌଣସି ତଥ୍ୟ କିମ୍ବା ସହଯୋଗ ଚାହିଁବ, ସେ ଯୋଗାଇଦେବାକୁ ପ୍ରସ୍ତୁତ ଅଛନ୍ତି। ମିଥ୍ୟା ଗୁଜବ ପ୍ରଚାର ନକରି ତଦନ୍ତର ସତ୍ୟତା ସାମ୍ନାକୁ ଆସିବାକୁ ଦିଆଯାଉ ବୋଲି ସେ ଗଣମାଧ୍ୟମ ମାଧ୍ୟମରେ ଅନୁରୋଧ କରିଛନ୍ତି।
#citykhabarbhadrak
Bhadrak Rural, Bhadrak | Nov 8, 2026