মৰিগাঁৱত নিৰন্তৰৰ একত্ৰিশ সংখ্যক কাৰ্যসূচী সম্পন্ন মৰিগাঁও জিলা শিক্ষা বিভাগে নিৰৱচ্ছিন্ন ভাৱে ৰূপায়ন কৰি অহা সদ্য অৱসৰপ্ৰাপ্ত শিক্ষক-কৰ্মচাৰী সকলৰ অৱসৰী সা-সুবিধা প্ৰদানৰ কাৰ্যসূচী "নিৰন্তৰ"ৰ ৩১ সংখ্যক কাৰ্যসূচী আজি জিলা শিক্ষা বিষয়াৰ কাৰ্যালয়ৰ ঐতিহ্য ভৱনত অনুষ্ঠিত হয়। মৰিগাঁও জিলাৰ বিদ্যালয় সমূহৰ পৰিদৰ্শক তথা মৰিগাঁও জিলা প্ৰাথমিক শিক্ষা বিষয়া ড° অপূৰ্ব ঠাকুৰীয়াই আঁত ধৰা অনুষ্ঠানটোত মৰিগাওঁ বি এড কলেজৰ অধ্যক্ষ ড০ ডলী বুঢ়াগোহাঁয়ে বিশিষ্ট অতিথি হিচাপে উপস্থিত থাকে। ভাষণ প্ৰসংগত ড০ বুঢ়াগোহাঁয়ে অৱসৰৰ পাছত জীৱনটো নতুনকৈ আৰম্ভ কৰাৰ সুযোগ বুলি কয়। তেখেতে অৱসৰী শিক্ষাগুৰু সকলক স্বাস্থ্যৰ প্ৰতি বিশেষ গুৰুত্ব আৰোপ কৰিবলৈ আহ্বান জনায়। অনুষ্ঠানত বিদ্যালয়সমূহৰ উপ-পৰিদৰ্শক সমৰ বৰুৱা, শিক্ষাবিভাগৰ বিষয়া-কৰ্মচাৰী, সদ্য অৱসৰী শিক্ষক-কৰ্মচাৰী সকল উপস্থিত থাকে। সভাত অন্তত শিক্ষা বিষয়া ড° ঠাকুৰীয়াই অৱসৰী শিক্ষক-কৰ্মচাৰী সকলক অৱসৰৰ পিছৰ সময়ছোৱা নিজৰ জীৱনৰ দীঘলীয়া অভিজ্ঞতাৰ আলম লৈ শৈক্ষিক ক্ষেত্ৰখনলৈ যথাসাধ্য সেৱা আগবঢ়াবলৈ আহ্বান জনায়। উল্লেখ্য যে সদ্য সমাপ্ত নিৰ্বাচনৰ পৰিপ্ৰেক্ষিতত এক তাৰিখৰ পৰিবৰ্তে আজি আয়োজিত অনুষ্ঠানটোত ১৬ গৰাকী অৱসৰপ্ৰাপ্ত শিক্ষক-কৰ্মচাৰীক অৱসৰকালীন সুবিধা সমূহ প্ৰদান কৰা হয়।

Laharighat, Morigaon | Oct 22, 2026

MORE NEWS