## **ધરમપુર શાક માર્કેટમાં નજીવા રૂ. 10 ના વિવાદમાં ગ્રાહક-વેપારી વચ્ચે ઉગ્ર બોલાચાલી, મામલો પોલીસ મથકે પહોંચતા ચર્ચા** વલસાડ જિલ્લાના ધરમપુરની શાકભાજી માર્કેટમાંથી એક ચોંકાવનારો અને ભારે આશ્ચર્ય પમાડે તેવો કિસ્સો સામે આવ્યો છે. અહીં ડુંગળી ખરીદવા આવેલા એક ગ્રાહક અને વેપારી વચ્ચે માત્ર ૧૦ રૂપિયા જેવી નજીવી રકમના લેણદેણને લઈને વિવાદ એટલો બધો વણસી ગયો કે મામલો છેક પોલીસ સ્ટેશન સુધી પહોંચી ગયો હતો. આ સમગ્ર ઘટના બજારમાં લાગેલા સીસીટીવી (CCTV) કેમેરામાં કેદ થઈ ગઈ છે, જેનો વીડિયો હાલ સોશિયલ મીડિયા પર સ્થાનિક લોકોમાં ભારે ચર્ચાનો વિષય બન્યો છે. મળતી માહિતી મુજબ, ધરમપુર શાક માર્કેટમાં એક ગ્રાહક ડુંગળી ખરીદવા આવ્યો હતો. ખરીદી કર્યા બાદ પૈસા ચૂકવતી વખતે ગ્રાહકે કથિત રીતે ૧૦ રૂપિયા ઓછા આપ્યા હતા, જેના કારણે વેપારી અને ગ્રાહક વચ્ચે બોલાચાલી શરૂ થઈ ગઈ હતી. જોતજોતામાં આ ઝઘડો એટલો વધી ગયો કે બંને પક્ષો વચ્ચે તીખી અણબનાવ અને ઉગ્ર દલીલો થવા લાગી હતી. બજારમાં હાજર અન્ય વેપારીઓ અને લોકોએ વચ્ચે પડીને મામલો શાંત પાડવાનો પ્રયાસ કર્યો હતો, પરંતુ બંનેમાંથી કોઈ પણ પક્ષ નમતું જોખવા તૈયાર ન હતો. આખરે બંને પક્ષો પોતાની ફરિયાદ લઈને પોલીસ મથકે પહોંચ્યા હતા. હાલ ધરમપુર પોલીસે બંને પક્ષોના નિવેદન નોંધીને કાયદેસરની તપાસ હાથ ધરી છે, પરંતુ માત્ર ૧૦ રૂપિયા માટે મામલો પોલીસ સુધી પહોંચતા પંથકમાં લોકચર્ચા જાગી છે. વધુ સમાચારો અને માહિતી માટે @aapnu_vapi સાથે જોડાયેલા રહો!