कल्याण रेल्वे स्टेशनवर प्रवाशाची धक्कादायक  फसवणूक!  १० रुपयांच्या प्लॅटफॉर्म तिकिटावर मार्करने '५' लिहून बनवले  ५१० रुपयांचे तिकीट; भामटा गजाआड कल्याण - कल्याण रेल्वे स्टेशनवर एका तरुण प्रवाशाची चलाखीने फसवणूक केल्याचा धक्कादायक प्रकार उघडकीस आला आहे. केवळ १० रुपयांच्या प्लॅटफॉर्म तिकिटावर मार्करने '५' लिहून ते ५१० रुपयांचे तिकीट असल्याचा बनाव करत तब्बल ५०० रुपये उकळणाऱ्या भामट्याला रेल्वे पोलिसांनी अटक केली आहे.ही घटना ५ ऑगस्ट २०२६ रोजी सकाळी ११ वाजण्याच्या सुमारास कल्याण रेल्वे स्टेशनच्या फलाट क्रमांक १ वरील तिकीट काउंटरसमोर घडली. सारिकुल मोहम्मद शेख हा हावडा (पश्चिम बंगाल) येथे जाण्यासाठी कल्याण स्टेशनवर आला होता. त्यावेळी अतुल अडलिंगे (वय ३२, रा. सोलापूर) याने त्याचा विश्वास संपादन केला. हावड्याचे तिकीट काढून देतो असे सांगत आरोपीने त्याला फक्त १०  रुपयांचे प्लॅटफॉर्म तिकीट दिले. त्यानंतर त्या तिकिटावर मार्कर पेनने '५' हा अंक लिहून ते ५१० रुपयांचे तिकीट असल्याचा भास निर्माण केला आणि प्रवाशाकडून ५०० रुपये उकळून फसवणूक केली.फिर्यादीने तत्काळ रेल्वे पोलिसांकडे धाव घेत तक्रार दाखल केली. त्यानंतर वरिष्ठ  पोलीस निरीक्षक अर्चना दुसाने यांच्या मार्गदर्शनाखाली पोलिसांनी तातडीने कारवाई करत आरोपी अतुल अडलिंगे याला अटक केली. या प्रकरणाचा पुढील तपास सुरू आहे. रेल्वे पोलिसांचे आवाहन रेल्वे प्रवाशांनी कोणत्याही अनोळखी किंवा अनधिकृत व्यक्तीकडून रेल्वे तिकीट खरेदी करू नये. तिकीट नेहमी अधिकृत तिकीट काउंटरवरून किंवा UTS मोबाईल ॲपद्वारेच काढावे, असे आवाहन रेल्वे पोलिसांनी केले आहे.