વાપીમાં પોલીસે ઝડપ્યું ઇન્ટરનેશનલ ફેક કોલ સેન્ટર: કેનેડિયન નાગરિકોને ડરાવી લાખો રૂપિયા પડાવતી ગેંગના 11 સાગરીતો મુદ્દામાલ સાથે જેલભેગા. વલસાડ જિલ્લા સ્પેશિયલ ઓપરેશન ગ્રુપ (SOG) ની ટીમને વિદેશી નાગરિકોને નિશાન બનાવતી આંતરરાષ્ટ્રીય ગેંગનો પર્દાફાશ કરવામાં મોટી સફળતા મળી છે. પોલીસે વાપીના હરિયા પાર્ક ડુંગરા વિસ્તારમાં રાતના અંધારામાં ધમધમતા એક હાઈટેક ઇન્ટરનેશનલ નકલી કોલ સેન્ટર પર બાતમીના આધારે ઓચિંતો દરોડો પાડ્યો હતો. આ શાતિર ઠગો કેનેડાના તપાસ અધિકારીઓ બનીને ત્યાંના નિર્દોષ નાગરિકોને ડરાવી-ધમકાવી લાખો રૂપિયા પડાવતા હતા. પોલીસે સ્થળ પરથી મહિલાઓ સહિત કુલ 11 આરોપીઓની ધરપકડ કરી છે. આ ઠગ ગેંગ કેનેડિયન નાગરિકોને ફોન કરીને 'તમારા પાર્સલમાંથી ગેરકાયદેસર વસ્તુઓ મળી છે અને જો ધરપકડથી બચવું હોય તો રૂપિયા આપો' તેમ કહી ઓનલાઈન નાણાં પડાવતી હતી. દરોડા દરમિયાન પોલીસે ઘટનાસ્થળેથી લેપટોપ, કેનેડિયન નાગરિકોનો ગુપ્ત ડેટા, મોબાઈલ ફોન સહિતનો મોટો મુદ્દામાલ કબજે કર્યો છે. આ હાઈટેક કૌભાંડના તાર ક્યાં સુધી જોડાયેલા છે અને અત્યાર સુધી કેટલા વિદેશી નાગરિકો ભોગ બન્યા છે, તે દિશામાં પોલીસે તમામ આરોપીઓને જેલભેગા કરી આગળની સઘન તપાસ તેજ કરી છે. વધુ સમાચારો અને માહિતી માટે @aapnu_vapi સાથે જોડાયેલા રહો!