विवेकानंद सेवा मंडळात ७ जून रोजी ‘डिस्कव्हर इंजिनिअरिंग’ मार्गदर्शन सत्र डोंबिवली : अभियांत्रिकी क्षेत्रात करिअर करू इच्छिणाऱ्या विद्यार्थ्यांना योग्य दिशा मिळावी या उद्देशाने विवेकानंद सेवा मंडळाच्या वतीने ‘डिस्कव्हर इंजिनिअरिंग’ या विशेष मार्गदर्शन सत्राचे आयोजन करण्यात आले आहे. हे सत्र शनिवार, ७ जून रोजी सायंकाळी ५ ते ७ या वेळेत ज्ञान मंदिर, दुसरा मजला, दत्ता नगर चौक, संगीता वाडी, डोंबिवली (पूर्व) येथे होणार आहे. १२ वी उत्तीर्ण विद्यार्थी तसेच त्यांच्या पालकांसाठी हे सत्र खुले आहे. या संवादात्मक सत्रात संगणक, यांत्रिकी, स्थापत्य आणि विद्युत अभियांत्रिकी अशा विविध शाखांची सविस्तर माहिती देण्यात येणार आहे. तसेच उद्योग क्षेत्रातील सध्याचे ट्रेंड्स, रोजगाराच्या संधी आणि भविष्यातील करिअरच्या वाटांबाबत तज्ज्ञांकडून मार्गदर्शन केले जाणार आहे. विद्यार्थ्यांना या सत्रादरम्यान तज्ज्ञांशी थेट संवाद साधण्याची, विविध शंकांचे निरसन करून घेण्याची तसेच आपल्या आवडीनुसार आणि क्षमतांनुसार योग्य करिअर निवडीसाठी मार्गदर्शन मिळविण्याची संधी उपलब्ध होणार आहे. अभियांत्रिकी शिक्षण आणि करिअरविषयी सखोल माहिती मिळविण्यास इच्छुक विद्यार्थ्यांनी व पालकांनी या संधीचा लाभ घ्यावा, असे आवाहन आयोजकांनी केले आहे. अधिक माहितीसाठी व मदत कक्ष संपर्क : 84509 19330