ৰাষ্ট্ৰীয় বয়োশ্ৰী যোজনা আৰু ADIP আঁচনিৰ অধীনত লাহৰীঘাটত নিৰীক্ষণ তথা পৰীক্ষা শিবিৰ অনুষ্ঠিত হয়।মৰিগাঁও জিলা প্ৰশাসন, মহিলা আৰু শিশু উন্নয়ন বিভাগ তথা ALIMCO-ৰ সহযোগত আজি মৈৰাবাৰী সংহত শিশু উন্নয়ন প্ৰকল্পৰ অধীনত ৰাষ্ট্ৰীয় বয়োশ্ৰী যোজনা (Rashtriya Vayoshri Yojana) আৰু ADIP আঁচনিৰ অধীনত এক বিশেষ পৰীক্ষা আৰু মূল্যায়ন শিবিৰ অনুষ্ঠিত হয়।উক্ত শিবিৰত শাৰীৰিক অসুবিধা বা বয়সজনিত সমস্যাত ভুগি থকা জেষ্ঠ্য নাগৰিকসকলক ৰাষ্ট্ৰীয় বয়োশ্ৰী যোজনাৰ অধীনত পৰীক্ষা কৰা হয়। একেদৰে ADIP আঁচনিৰ অধীনত বিশেষভাৱে সক্ষম ব্যক্তিসকলৰ স্বাস্থ্য পৰীক্ষা আৰু প্ৰয়োজনীয় মূল্যায়ন সম্পন্ন কৰা হয়।শিবিৰত উপস্থিত বিশেষজ্ঞ দলটোৱে হিতাধিকাৰীসকলৰ স্বাস্থ্যজনিত অৱস্থা আৰু দৈনন্দিন জীৱনত সন্মুখীন হোৱা অসুবিধাসমূহ পৰ্যবেক্ষণ কৰি তেওঁলোকৰ বাবে কেনে ধৰণৰ সহায়ক সঁজুলি—যেনে হুইলচেয়াৰ, শ্ৰৱণ যন্ত্ৰ, ৱাকিং ষ্টিক, ক্ৰাচ, ত্ৰিচাইকেল আদি—প্ৰয়োজন হ’ব পাৰে, তাৰ মূল্যায়ন কৰে। এই বাছনিৰ ভিত্তিত পৰৱৰ্তী সময়ত যোগ্য হিতাধিকাৰীসকলক বিনামূলীয়াকৈ এই সঁজুলিসমূহ প্ৰদান কৰা হ’ব। উল্লেখ্য যে, মৰিগাঁও জিলাত ২৯ মে’ৰ পৰা ৮ জুনলৈকে এনে মূল্যায়ন শিবিৰ অনুষ্ঠিত হৈ আছে। আজি মৈৰাবাৰী সংহত শিশু উন্নয়ন প্ৰকল্পৰ অধীনস্থ মৰিগাঁও জিলাৰ বিভিন্ন অঞ্চলৰ মুঠ ১২০ জন হিতাধিকাৰীৰ পৰীক্ষা সম্পন্ন কৰা হয়।লাহৰীঘাট উন্নয়ন খণ্ডৰ প্ৰেক্ষাগৃহত অনুষ্ঠিত হোৱা শিবিৰৰ সফল পৰিচালনাত মৈৰাবাৰী সংহত শিশু উন্নয়ন প্ৰকল্পৰ চুপাৰভাইজাৰ শ্ৰীমতী বিনিতা বেজ আৰু শ্ৰীমতী এলিজা বেগমে গুৰুত্বপূৰ্ণ ভূমিকা পালন কৰে। লগতে ALIMCO-ৰ সম্পূৰ্ণ বিষয়া দলটোৱে উপস্থিত থাকি পৰীক্ষা আৰু মূল্যায়ন কাৰ্য সুচাৰুৰূপে সম্পন্ন কৰে। এই পদক্ষেপে জেষ্ঠ্য নাগৰিক আৰু বিশেষভাৱে সক্ষম ব্যক্তিসকলৰ জীৱনধাৰণ অধিক সহজ, স্বাৱলম্বী আৰু আৰামদায়ক কৰি তোলাত বিশেষ সহায়ক হ’ব বুলি আশা প্ৰকাশ কৰা হৈছে।