କ୍ୟାନ୍ସର ସହ ହାରିଗଲା ଜୀବନ: ଚାଲିଗଲେ ସମସ୍ତଙ୍କ ପ୍ରିୟ LIC ଏଜେଣ୍ଟ ଉମେଶ ବସ୍ତିଆ, ଅସହାୟ ପରିବାର ପାଇଁ ଆଖିରୁ ଶୁଖୁନି ଲୁହ, ସହାୟତା ପାଇଁ ଦାବି
କଣ୍ଟାମାଳ / ବୌଦ୍ଧ:
ବିଧିର ବିଧାନ ବଡ଼ ନିଷ୍ଠୁର। ଦୀର୍ଘ ଦିନର ସଂଗ୍ରାମ ପରେ ଶେଷରେ କ୍ୟାନ୍ସର ଭଳି ମାରାତ୍ମକ ରୋଗ ନିକଟରେ ହାର୍ ମାନିଛନ୍ତି ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ବିଲାସପୁର ପଞ୍ଚାୟତ କିରକିଚିପାଲି ଗ୍ରାମର ଜଣାଶୁଣା LIC ଏଜେଣ୍ଟ ଉମେଶ ବସ୍ତିଆ (୪୨)। ତାଙ୍କର ଏହି ଅକାଳ ବିୟୋଗରେ ସମଗ୍ର ଅଞ୍ଚଳରେ ଶୋକର ଛାୟା ଖେଳି ଯାଇଛି । ମେଳାପୀ, ମିଷ୍ଟଭାଷୀ ଓ ସଦାସର୍ବଦା ଅନ୍ୟର ଦୁଃଖରେ ଛିଡ଼ା ହେଉଥିବା ଜଣେ ପରୋପକାରୀ ମଣିଷ ଭାବେ ଉମେଶ ସମସ୍ତଙ୍କର ଅତି ପ୍ରିୟ ଥିଲେ। ଗୋଟିଏ ପଟେ କ୍ୟାନ୍ସର ରୋଗ ସହ ସଂଗ୍ରାମ କରି ରାୟପୁରର ଏକ ଘରୋଇ ଡାକ୍ତରଖାନାରେ ସେ ଚିକିତ୍ସିତ ହେଉଥିଲେ। ସମ୍ବଳ ନଥିଲେ ବି ପରିବାର ଲୋକେ ସର୍ବସ୍ୱ ହରାଇ ଲକ୍ଷାଧିକ ଟଙ୍କା ଖର୍ଚ୍ଚ କରି ତାଙ୍କୁ ବଞ୍ଚାଇବାକୁ ଆପ୍ରାଣ ଚେଷ୍ଟା ଚଳାଇଥିଲେ। ହେଲେ ନିୟତିର ଖେଳ ଥିଲା ଭିନ୍ନ। ଗତକାଲି ହଠାତ୍ ବ୍ରେନ୍ ହେମ୍ରେଜ୍ (Brain Hemorrhage) ହେବା ଯୋଗୁଁ ସବୁ ଚିକିତ୍ସା ବିଫଳ ହୋଇଥିଲା, ଆଉ ସେ ସାରାଦିନ ପାଇଁ ଆଖି ବୁଜିଥିଲେ।
ଆଜି ତାଙ୍କର ମୃତଦେହ ଗାଁକୁ ଫେରିବା ପରେ ଏକ ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଥିଲା। ଆଖପାଖ ଅଞ୍ଚଳର ଶହ ଶହ ଲୋକ ତାଙ୍କ ଶେଷ ଦର୍ଶନ ପାଇଁ ଛୁଟି ଆସିଥିଲେ, ସମସ୍ତଙ୍କ ଆଖିରେ ଥିଲା ଲୁହ। ପଛରେ ଛାଡ଼ିଯାଇଛନ୍ତି ସ୍ତ୍ରୀ, ୧୩ ବର୍ଷର ଅବୁଝା ପୁଅ ଓ ୧୦ ବର୍ଷର କୋମଳମତି ଝିଅ । ରୋଜଗାରିଆ ମୁରବୀଙ୍କୁ ହରାଇ ଆଜି ଏହି ନିରୀହ ପରିବାରଟି ସମ୍ପୂର୍ଣ୍ଣ ବେସାହାରା ଓ ଅସହାୟ ହୋଇପଡ଼ିଛି। ପିଲା ଦୁଇଟିଙ୍କ ଭବିଷ୍ୟତ ଓ ପାଠପଢ଼ାକୁ ନେଇ ସ୍ତ୍ରୀଙ୍କ ଆଖିରୁ ଲୁହ ଶୁଖୁନାହିଁ। ଏହି ହୃଦୟବିଦାରକ ପରିସ୍ଥିତିକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ତୁରନ୍ତ ଏହି ଅସହାୟ ପରିବାର ପ୍ରତି ଦୃଷ୍ଟି ଦେଇ ପିଲାମାନଙ୍କ ପାଠପଢ଼ା ଓ ପରିବାରର ଗୁଜରାଣ ପାଇଁ ସରକାରୀ ସହାୟତା ଯୋଗାଇ ଦେବାକୁ ସାଧାରଣରେ ଆକୁଳ ଦାବି ହେଉଛି।
#Boudh #Kantamal #Bilaspur #Kirarkichipali #SadNews #TragicLoss #UmeshBastia #OdishaNews #BoudhNews #BouddhaTimes
