दोन वर्षे पोलिसांना गुंगारा देणारा कुख्यात बिल्डर सलमान डोलारे अखेर जेरबंद; झोन-३ पोलीस आणि क्राइम ब्रँचची संयुक्त कारवाई कल्याण : गेल्या दोन वर्षांपासून पोलीस आणि क्राइम ब्रँचच्या शोधात असलेला कुख्यात बिल्डर सलमान डोलारे अखेर पोलिसांच्या जाळ्यात अडकला आहे. झोन-३ पोलीस आणि क्राइम ब्रँचच्या संयुक्त पथकाने धडक कारवाई करत त्याला ताब्यात घेतले. आरक्षित भूखंडांवर बेकायदा बांधकाम करून नागरिकांची फसवणूक केल्याप्रकरणी सलमान डोलारे याच्याविरोधात अनेक गंभीर गुन्हे दाखल आहेत. पोलीस तपासादरम्यान डोलारे हा कल्याणमधील दूधनाका परिसरातील खोटाल मंजिल इमारतीच्या चौथ्या मजल्यावर लपून बसल्याची माहिती पोलिसांना मिळाली होती. या माहितीच्या आधारे क्राइम ब्रँच आणि स्थानिक पोलिसांनी संयुक्त छापा टाकून त्याला ताब्यात घेतले. सलमान डोलारे याच्याविरुद्ध महात्मा फुले पोलीस ठाणे आणि बाजारपेठ पोलीस ठाण्यात बारापेक्षा अधिक गुन्हे दाखल असल्याची माहिती समोर आली आहे. कल्याणमधील युसूफ हाइट्ससह आरक्षित भूखंडांवर खोट्या सह्या आणि बनावट कागदपत्रांच्या आधारे बेकायदा इमारती उभारल्याप्रकरणी देखील त्याच्याविरोधात गुन्हे नोंद आहेत.याशिवाय, इतर बेकायदा इमारती आणि बंगल्यांच्या बांधकामांशी संबंधित फसवणूक प्रकरणांमध्येही त्याचे नाव समोर आले आहे. जमीन व्यवहारांमध्ये नागरिकांची फसवणूक केल्याप्रकरणी स्वतंत्र गुन्हे दाखल असून तलाठ्याची बनावट सही, बनावट शिक्के आणि खोटे दस्तऐवज तयार केल्याचे गंभीर आरोपही त्याच्यावर आहेत.दरम्यान, सलमान डोलारेला ताब्यात घेतल्यानंतर परिसरात काही काळ तणावाचे वातावरण निर्माण झाले होते. कोणताही अनुचित प्रकार घडू नये यासाठी पोलिसांनी परिसरातील बंदोबस्त वाढविला असून पुढील तपास सुरू आहे.