*মৰিগাঁৱত AES/JE আৰু অন্যান্য বাহক-জনিত ৰোগ সন্দৰ্ভত জিলা টাস্ক ফ’ৰ্চৰ বৈঠক অনুষ্ঠিত* মৰিগাঁও জিলা আয়ুক্ত কাৰ্যালয়ৰ সভাকক্ষত আজি AES/JE আৰু অন্যান্য বাহক-জনিত ৰোগ (VBDs) সন্দৰ্ভত প্ৰথমখন জিলা টাস্ক ফ’ৰ্চ বৈঠক অনুষ্ঠিত হয়। বৈঠকত অতিৰিক্ত জিলা আয়ুক্ত শ্ৰীমতী নিতিশা বৰাই উপস্থিতসকলক উদ্দেশ্যি ভাষণ আগবঢ়ায়। বৈঠকত মৰিগাঁও জিলাৰ যুটীয়া স্বাস্থ্য সেৱা সঞ্চালক, স্বাস্থ্য বিভাগৰ বিষয়া আৰু অন্যান্য লাইন বিভাগসমূহৰ বিষয়াসকল উপস্থিত থাকে। বৈঠকত আকিউট এনচেফেলাইটিছ ছিণ্ড্ৰ’ম (AES), জাপানীজ এনচেফেলাইটিছ (JE) আৰু অন্যান্য বাহক-জনিত ৰোগসমূহৰ প্ৰতিৰোধ আৰু নিয়ন্ত্ৰণৰ বাবে গ্ৰহণ কৰা প্ৰস্তুতি আৰু চলি থকা ব্যৱস্থাসমূহ পৰ্যালোচনা কৰা হয়। লগতে নজৰদাৰী ব্যৱস্থা অধিক শক্তিশালী কৰা, সময়মতে ৰোগ নিৰ্ণয় আৰু চিকিৎসা নিশ্চিত কৰা, জনসচেতনতা বৃদ্ধি, পৰিচ্ছন্নতা বজাই ৰখা আৰু বৰষুণৰ সময়ছোৱাত সম্ভাৱ্য প্ৰাদুৰ্ভাৱ ৰোধৰ বাবে আন্তঃবিভাগীয় সমন্বয় অধিক জোৰদাৰ কৰাৰ ওপৰত গুৰুত্ব আৰোপ কৰা হয়। বৈঠকত ভাষণ প্ৰদান কৰি অতিৰিক্ত জিলা আয়ুক্ত শ্ৰীমতী নিতিশা বৰাই সংশ্লিষ্ট সকলো বিভাগক ঘনিষ্ঠ সমন্বয়ৰে কাম কৰি জিলাখনত প্ৰতিৰোধমূলক ব্যৱস্থাসমূহ কাৰ্যকৰীভাৱে ৰূপায়ণ নিশ্চিত কৰিবলৈ আহ্বান জনায়।