👉 ବର୍ହାମୁଣ୍ଡା ଗ୍ରାମରେ ନୂଆଁଖାଇ ଭେଟଘାଟ କାର୍ଯ୍ୟକ୍ରମ ବର୍ହାମୁଣ୍ଡା ଗ୍ରାମରେ ଗଣେଶ ପୂଜା କମିଟି ଓ ଗ୍ରାମବାସୀଙ୍କ ସହଯୋଗରେ ନୂଆଁଖାଇ ଭେଟଘାଟ କାର୍ଯ୍ୟକ୍ରମ ଆନନ୍ଦ ଓ ଉତ୍ସାହର ସହିତ ଅନୁଷ୍ଠିତ ହୋଇଯାଇଛି। ଦିନବ୍ୟାପୀ ଏହି କାର୍ଯ୍ୟକ୍ରମରେ ଧାର୍ମିକ, ସାଂସ୍କୃତିକ ଓ ମନୋରଞ୍ଜନଧର୍ମୀ କାର୍ଯ୍ୟକ୍ରମ ସହ ଗ୍ରାମର ପ୍ରତିଭାବାନ ବ୍ୟକ୍ତିଙ୍କୁ ସମ୍ମାନିତ କରାଯାଇଥିଲା। ସକାଳ ୧୧ଟାରେ ସୁନ୍ଦରାକାଣ୍ଡ ପାରାୟଣ ଅନୁଷ୍ଠିତ ହୋଇଥିଲା। ଭୂତିବାହାଲର ବୈସ୍ମିତା ସାହୁ ଓ ସାଥୀମାନେ ପାରାୟଣ ପରିବେଷଣ କରି ଉପସ୍ଥିତ ଭକ୍ତମାନଙ୍କୁ ଭକ୍ତିରସରେ ବିମୋହିତ କରିଥିଲେ। ସନ୍ଧ୍ୟା ୪ଟାରେ ଗ୍ରାମର ଶିଶୁ, ଯୁବକ ଓ ମହିଳାମାନଙ୍କୁ ନେଇ ବିଭିନ୍ନ ପ୍ରତିଯୋଗିତା ଆୟୋଜିତ ହୋଇଥିଲା। ସନ୍ଧ୍ୟା ୭ଟାରେ ନୂଆଁଖାଇ ଭେଟଘାଟର ମୁଖ୍ୟ ସଭା ଅନୁଷ୍ଠିତ ହୋଇଥିଲା। ଏଥିରେ ବର୍ହାମୁଣ୍ଡା ପ୍ରାଥମିକ ବିଦ୍ୟାଳୟର ଅବସରପ୍ରାପ୍ତ ପ୍ରଧାନଶିକ୍ଷକ ଶ୍ରୀ ଶ୍ୟାମସୁନ୍ଦର ପଧାନ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ବର୍ତ୍ତମାନର ପ୍ରଧାନଶିକ୍ଷକ ଶ୍ରୀ ମନୋରଞ୍ଜନ ସାହୁ, ସହକାରୀ ଶିକ୍ଷକ ଶ୍ରୀ ଧନେଶ୍ୱର ବରିହା, ଗ୍ରାମର ଗୌନ୍ତିଆ ଲୋକନାଥ ଭୋଇ, ୱାର୍ଡମେମ୍ବର ଭଗବାନ ଭୋଇ, ପୁରାତନ ୱାର୍ଡମେମ୍ବର ଜୟମଙ୍ଗଳ ମଲ୍ଲିକ, ଚୌକିଦାର ଲୋଚନ କୁମ୍ଭାର, ଝାଙ୍କର ଲିଙ୍ଗ ମଲ୍ଲିକ ଓ ପ୍ରମୋଦ କୁମ୍ଭାର ପ୍ରମୁଖ ମଞ୍ଚାସୀନ ଥିଲେ। ଏହି ଅବସରରେ ଗ୍ରାମରେ ବିଦ୍ୟାଳୟ ସ୍ଥାପନ ପାଇଁ ଜମିଦାନ କରିଥିବା ପୁରାତନ ୱାର୍ଡମେମ୍ବର ଶ୍ରୀ ରାଜେନ୍ଦ୍ର ସାହୁଙ୍କୁ ମୁଖ୍ୟ ଅତିଥିଙ୍କ ଦ୍ୱାରା ଉପଢୌକନ ଓ ମାନପତ୍ର ପ୍ରଦାନ କରି ସମ୍ମାନିତ କରାଯାଇଥିଲା। ସେହିପରି ବର୍ହାମୁଣ୍ଡା ପ୍ରାଥମିକ ବିଦ୍ୟାଳୟରୁ ପ୍ରଥମ ଥର ପାଇଁ ସରକାରୀ କ୍ଷେତ୍ରରେ ଅଧ୍ୟାପକ ଭାବେ କାର୍ଯ୍ୟରତ ଶ୍ରୀ ସରୋଜ ସାହୁଙ୍କୁ ମଧ୍ୟ ଉପଢୌକନ ଓ ମାନପତ୍ର ପ୍ରଦାନ କରାଯାଇଥିଲା। ସମାଜସେବୀ ତଥା ଯୁବ ସାମ୍ବାଦିକ ଶ୍ରୀ ସୁଶାନ୍ତ ପଣ୍ଡା ଯୋଗଦେଇ ନୂଆଁଖାଇ ପର୍ବର ଭାଇଚାରା ଓ ଏକତାର ମହତ୍ତ୍ୱ ଉପରେ ଆଲୋକପାତ କରିବା ସହ ଯୁବପିଢ଼ି କିପରି ଏକାଠି ହୋଇ ନୂଆଁଖାଇ ପାଳନ କରିବେ ସେନେଇ ପରାମର୍ଶ ଦେଇଥିଲେ। ଶ୍ରୀ ଖଗେଶ୍ୱର ସାହୁ ସମସ୍ତ କାର୍ଯ୍ୟକ୍ରମର ସଂଯୋଜନା କରିଥିବା ବେଳେ ଶ୍ରୀ ରାଧାକାନ୍ତ ସାହୁ ପ୍ରତିଯୋଗିତାରେ ପୁରସ୍କୃତ ପ୍ରତିଭାଗୀମାନଙ୍କ ନାମ ଘୋଷଣା କରିଥିଲେ। ଅତିଥିମାନେ ନିଜର ମୂଲ୍ୟବାନ ସମୟ ଦେଇ କାର୍ଯ୍ୟକ୍ରମରେ ଯୋଗଦେଇଥିବାରୁ ଶ୍ରୀ କୁଳମଣି ସାହୁ ଧନ୍ୟବାଦ ଅର୍ପଣ କରିଥିଲେ। ରାତି ୮ଟା ୩୦ରେ ଗ୍ରାମର କଳାକାରମାନଙ୍କୁ ନେଇ ବିଭିନ୍ନ ମନୋରଞ୍ଜନ କାର୍ଯ୍ୟକ୍ରମ, ଗୀତ, ନାଟକ ଓ କମେଡି ପରିବେଷଣ କରାଯାଇଥିଲା। କୋଷାଧ୍ୟକ୍ଷ ଭାବେ ଶ୍ରୀ ବିଘ୍ନରାଜ ସାହୁ ଦାୟିତ୍ୱ ତୁଲାଇଥିଲେ। ସାମ୍ବାଦିକ ଶ୍ରୀ ମଙ୍ଗୁଲୁ ସାହୁ କାର୍ଯ୍ୟକ୍ରମ ସଫଳ ହୋଇଥିବାରୁ ସମସ୍ତ କମିଟି ସଦସ୍ୟ ଓ ସହଯୋଗୀ ଗ୍ରାମବାସୀଙ୍କୁ ଧନ୍ୟବାଦ ଜଣାଇଥିଲେ। ପରିଶେଷରେ କମିଟିର ପିଲାମାନଙ୍କ ଦ୍ୱାରା ସାମୂହିକ ନୃତ୍ୟ ପରିବେଷଣ କରାଯାଇଥିଲା। ଏକାଠି ଅନ୍ନଛତ୍ରରେ ଭୋଜନ କରିବାର ସୁବ୍ୟବସ୍ଥା ହୋଇଥିବାରୁ ଗ୍ରାମବାସୀଙ୍କ ମଧ୍ୟରେ ଭାଇଚାରା ଓ ଆତ୍ମୀୟତାର ପରିବେଶ ସୃଷ୍ଟି ହୋଇଥିଲା। ଆଗାମୀ ଦିନରେ ଏହିପରି ଆହୁରି ବଡ଼ ବଡ଼ ସାମାଜିକ ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ନେଇ ମଧ୍ୟ ଯୋଜନା କରାଯାଇଥିଲା।

Bargarh, Bargarh (Baragarh) | Sep 17, 2026

MORE NEWS