१४२.२३० ग्रॅम एमडी ड्रग्ज प्रकरणात आरोपीला जामीन मंजूर; अ‍ॅड. राजेश राजपुरोहित यांचा न्यायालयात युक्तिवाद
पिंपरी-चिंचवड, पुणे | १२ ऑक्टोबर २०२६
पिंपरी-चिंचवड येथील अमली पदार्थविरोधी कायद्यांतर्गत (NDPS Act) दाखल असलेल्या एका महत्त्वपूर्ण प्रकरणात अतिरिक्त सत्र न्यायालयाने आरोपीला नियमित जामीन मंजूर केला आहे. या प्रकरणात १४२.२३० ग्रॅम मेफेड्रोन (एमडी) हा अमली पदार्थ जप्त केल्याचा आरोप असून, त्याची किंमत अंदाजे १५ लाख १२ हजार ३०० रुपये असल्याचे नमूद करण्यात आले आहे. चिंचवड पोलीस ठाण्यात गुन्हा क्रमांक ४१/२०२६ अंतर्गत एनडीपीएस कायद्याच्या कलम ८(क), २२(क) आणि २९ अन्वये हा गुन्हा दाखल करण्यात आला होता.
न्यायालयीन आदेशानुसार, या प्रकरणातील आरोपीला २४ फेब्रुवारी २०२६ रोजी राजस्थानमधील बिलारा येथे अटक करण्यात आली होती.
जामीन अर्जावर सुनावणीदरम्यान बचाव पक्षाचे वकील अ‍ॅड. राजेश राजपुरोहित यांनी प्रभावी युक्तिवाद केला. त्यांनी मुंबई उच्च न्यायालय आणि सर्वोच्च न्यायालयाच्या न्यायनिर्णयांचा आधार घेत आरोपीच्या जामिनासाठी बाजू मांडली. आरोपीकडून थेट कोणताही अमली पदार्थ जप्त करण्यात आलेला नसल्याचा मुद्दा बचाव पक्षाने उपस्थित केला. तसेच, आरोपीचा कथित गुन्ह्याशी संबंध जोडण्यासाठी वापरण्यात आलेल्या पुराव्यांवरही प्रश्न उपस्थित करण्यात आले.
दुसरीकडे, सरकारी पक्षाने आरोपीचा अमली पदार्थांच्या पुरवठा साखळीतील कथित सहभाग, आर्थिक व्यवहार आणि पूर्वीच्या गुन्हेगारी नोंदींचा आधार घेत जामीन अर्जाला विरोध केला.
दोन्ही बाजूंचे युक्तिवाद आणि उपलब्ध कागदपत्रांचा विचार केल्यानंतर न्यायालयाने आरोपीला नियमित जामीन मंजूर केला. यासाठी आरोपीला ५० हजार रुपयांचा वैयक्तिक जातमुचलका आणि त्याच रकमेचे एक किंवा अधिक जामीनदार सादर करण्याचे निर्देश देण्यात आले आहेत. जामीन आदेशातील इतर अटींचे पालन करणेही आरोपीस बंधनकारक आहे.
या प्रकरणात आरोपीच्या वतीने अ‍ॅड. राजेश राजपुरोहित, अ‍ॅड. प्रीती धुळे, अ‍ॅड. महेश मार्कड, अ‍ॅड. रोहित घोलप, तनया जगदाळे, प्रणिल चौधरी आणि विपुल पांडेय यांनी काम पाहिले.
Pune City, Pune | Oct 15, 2026
