କବିତାକୁ ଦୃଷ୍ଟାନ୍ତମୂଳକ କରିବାକୁ କବିମାନେ ପ୍ରୟାସ କରିବା ଆବଶ୍ୟକ, କବିତା ମୁଁ ନୁହେଁ ଆମେ ବୋଲି ଉଚ୍ଚାରଣ କରେ, ଯେଉଁଥିରେ ସାର୍ବଜନିନ ବାର୍ତ୍ତା ଉଦ୍ଘୋଷିତ ହୋଇଥାଏ ବୋଲି ଗାଁ ମଜଲିସ୍ ସହିତ୍ୟ ସଂସଦ ୩୬ତମ ବାର୍ଷିକ ଉତ୍ସବ ମୁଖ୍ୟ ଅତିଥି ଭାବେ ଯୋଗଦେଇ ଡ. ବୈଷ୍ଣବ ଚରଣ ସାମଲ କହିଥିଲେ। ସୋର ସଂସ୍କୃତି ଭବନ ପରିସରରେ ଡ. ରମାକାନ୍ତ ବେହେରାଙ୍କ ପୌରୋହିତ୍ୟରେ ଅନୁଷ୍ଠିତ ଉକ୍ତ ଉତ୍ସବରେ ଉଦ୍ଘାଟକ ଭାବେ ସୋର ବିଧାୟକ ମାଧବ ଧଡ଼ା ଯୋଗଦେଇ କହିଲେ ଯେ ସାରା ଓଡ଼ିଶାରୁ ଯୋଗଦେଇଥିବା ସାରସ୍ୱତ ସାଧକମାନଙ୍କ ଅଗମନ ରାଧାନାଥ ମାଟି ସୋରକୁ ଆଜି ସାହିତ୍ୟମୟ କରିପାରିଛି।