तुळजाभवानी मंदिरातील दर्शन व्यवस्थेत मोठा बदल; 18 जूनपासून सर्व भाविकांना समान ठिकाणाहून दर्शन प्रतिनिधी : जुबेर शेख तुळजापूर : महाराष्ट्राचे कुलदैवत असलेल्या श्री तुळजाभवानी मंदिरात दर्शनासाठी येणाऱ्या लाखो भाविकांसाठी अत्यंत महत्त्वाचा निर्णय घेण्यात आला आहे. मंदिर प्रशासनाने दर्शन व्यवस्थेत मोठा बदल करत 18 जूनपासून नवीन दर्शन पद्धती लागू करण्याचा निर्णय घेतला आहे. या नव्या व्यवस्थेमुळे देणगी दर्शन आणि धर्मदर्शन रांगेतील भाविकांना आता एकाच ठिकाणाहून आणि समान अंतरावरून आई तुळजाभवानीचे दर्शन घेता येणार आहे. मंदिर संस्थानच्या वतीने जाहीर करण्यात आलेल्या माहितीनुसार, 500 रुपये देणगी दर्शन पासधारक तसेच रेफरल देणगी दर्शन पासधारक भाविकांना राजे शहाजी महाद्वार मार्गे प्रवेश दिला जाणार आहे. तर 200 रुपये देणगी दर्शन पासधारकांना बिडकर पायऱ्या मार्गे दर्शन मंडपाच्या पहिल्या मजल्यावरून प्रवेश मिळणार आहे. धर्मदर्शनासाठी येणाऱ्या भाविकांना दर्शन मंडपाच्या चौथ्या मजल्यावरून प्रवेश देण्यात येणार आहे. नव्या व्यवस्थेतील सर्वात महत्त्वाचा बदल म्हणजे दर्शन मंडपाच्या पहिल्या मजल्यावरील भुयारी मार्गात सर्व रांगा एकत्र केल्या जाणार आहेत. त्यानंतर सर्व भाविकांना एकाच मार्गाने आणि समान पद्धतीने श्री तुळजाभवानी देवींच्या दर्शनासाठी सोडण्यात येणार आहे. त्यामुळे देणगी दर्शन आणि सामान्य भाविकांच्या दर्शनातील अनेक वर्षांपासूनचा फरक आता संपुष्टात येणार आहे. मंदिर प्रशासनाच्या म्हणण्यानुसार, जुन्या व्यवस्थेत देणगी दर्शन रांगेतील भाविकांमुळे धर्मदर्शन रांगेतील भाविकांना अनेकदा विलंब सहन करावा लागत होता. तसेच सिंहासन पूजा आणि अभिषेक पूजा सुरू असताना देणगी दर्शन रांग काही काळ थांबवावी लागत होती. नव्या व्यवस्थेमुळे या अडचणी दूर होण्यास मदत होणार असून देणगी दर्शन पासधारकांना अधिक सुलभ आणि अखंड दर्शन सुविधा उपलब्ध होणार आहे. मुखदर्शनासाठी येणाऱ्या भाविकांची स्वतंत्र व्यवस्था पूर्वीप्रमाणे कायम ठेवण्यात आली आहे. तसेच सिंहासन पूजा व अभिषेक पूजेच्या व्यवस्थेत कोणताही बदल करण्यात आलेला नाही, असे मंदिर प्रशासनाने स्पष्ट केले आहे. भाविकांना अधिक सुलभ, शिस्तबद्ध आणि समान दर्शन मिळावे, दर्शन प्रक्रियेत पारदर्शकता यावी तसेच गर्दीचे व्यवस्थापन अधिक प्रभावीपणे करता यावे या उद्देशाने हा निर्णय घेण्यात आल्याचे मंदिर संस्थानने सांगितले आहे. नव्या दर्शन व्यवस्थेला भाविकांकडून सकारात्मक प्रतिसाद मिळेल, असा विश्वासही प्रशासनाने व्यक्त केला आहे. दरम्यान, 18 जूनपासून लागू होणाऱ्या या नव्या व्यवस्थेस सर्व भाविकांनी सहकार्य करावे, असे आवाहन श्री तुळजाभवानी मंदिर संस्थानच्या वतीने करण्यात आले आहे. #तुळजाभवानी_मंदिर #तुळजापूर #आईतुळजाभवानी #दर्शनव्यवस्था #देणगीदर्शन #धर्मदर्शन #मंदिरप्रशासन #भाविकांसाठी_आनंदवार्ता #तुळजाभवानीदर्शन #महाराष्ट्राचे_कुलदैवत #TempleNews #TuljabhavaniTemple #Tuljapur #MaharashtraNews #VeerMaharashtraNews #BreakingNews #DevotionalNews #TempleUpdate #ViralNews #LatestUpdates