👉 NEETରେ ସଫଳତା, ଡାକ୍ତରୀ ପଢ଼ିବେ ସ୍ମିତାରାଣୀ 👉 ଗରିବ ମେଧାବୀ ଛାତ୍ରୀଙ୍କୁ ଫିଡ୍ ଟ୍ରଷ୍ଟର ୩୦ ହଜାର ଟଙ୍କା ସହାୟତା ବରଗଡ଼: ଗରିବ ଓ ମେଧାବୀ ଛାତ୍ରଛାତ୍ରୀଙ୍କ ଉଚ୍ଚଶିକ୍ଷାରେ ସହଯୋଗର ହାତ ବଢ଼ାଇଛି ବରଗଡ଼ର ଦାତବ୍ୟ ଅନୁଷ୍ଠାନ ଫିଡ୍ ଟ୍ରଷ୍ଟ। ଗାଇସିଲେଟ ବ୍ଲକ ଅନ୍ତର୍ଗତ କରୀମୁଣ୍ଡା ଗ୍ରାମର ମେଧାବୀ ଛାତ୍ରୀ ସ୍ମିତାରାଣୀ ବାଗଙ୍କ ଡାକ୍ତରୀ ପାଠ୍ୟକ୍ରମରେ ନାମଲେଖା ପାଇଁ ଟ୍ରଷ୍ଟ ପକ୍ଷରୁ ୩୦ ହଜାର ଟଙ୍କାର ଆର୍ଥିକ ସହାୟତା ପ୍ରଦାନ କରାଯାଇଛି। କରୀମୁଣ୍ଡା ଗ୍ରାମର ରାଧାକାନ୍ତ ବାଗ ଓ ରୀତି ବାଗଙ୍କ ଝିଅ ସ୍ମିତାରାଣୀ ବାଗ ଜାତୀୟ ଯୋଗ୍ୟତା ଓ ପ୍ରବେଶିକା ପରୀକ୍ଷା NEETରେ ସଫଳତା ହାସଲ କରି ବଲାଙ୍ଗୀରସ୍ଥିତ ଭୀମ ଭୋଇ ସରକାରୀ ମେଡିକାଲ କଲେଜ ଆଣ୍ଡ ହସ୍ପିଟାଲରେ ନାମଲେଖା ପାଇଁ ମନୋନୀତ ହୋଇଛନ୍ତି। ତେବେ ବସ୍ ଚାଳକ ଭାବେ କାମ କରୁଥିବା ତାଙ୍କ ବାପାଙ୍କ ପାରିବାରିକ ଆୟ ସୀମିତ ଥିବାରୁ ନାମଲେଖା ଖର୍ଚ୍ଚ ଯୋଗାଡ଼ କରିବା ପରିବାର ପାଇଁ ଚିନ୍ତାର କାରଣ ପାଲଟିଥିଲା। ଏହି ସମୟରେ ଫିଡ୍ ଟ୍ରଷ୍ଟ ବିଷୟରେ ଜାଣି ପରିବାର ଟ୍ରଷ୍ଟର ଦ୍ୱାରସ୍ଥ ହୋଇଥିଲେ। ପରିସ୍ଥିତିର ଗୁରୁତ୍ୱକୁ ହୃଦୟଙ୍ଗମ କରି ଟ୍ରଷ୍ଟର ଚେୟାରମେନ ଫଣୀନ୍ଦ୍ର କୁମାର ତାଣ୍ଡିଙ୍କ ନେତୃତ୍ୱରେ କ୍ରିଷ୍ଣା ସୁନା, ହରିହର ବିଭାର, ଲକ୍ଷ୍ମଣ ଛୁରିଆ, ଗୌର କନ୍ଧ, ମନୋଜ ମହାନନ୍ଦ, ପ୍ରମୋଦ କୁମ୍ଭାର, ପଦ୍ମାବତୀ କୁମ୍ଭାର, ଦଶରଥ ବାଗ, ଅଶୋକ କଲେତ, ସଲମାନ୍ ଦୀପ, ରବୀନ୍ଦ୍ର ଦୀପ ପ୍ରମୁଖ କରୀମୁଣ୍ଡା ଗ୍ରାମକୁ ପହଞ୍ଚିଥିଲେ। ସେଠାରେ ସ୍ମିତାରାଣୀଙ୍କ ଡାକ୍ତରୀ ପାଠପଢ଼ାରେ ନାମଲେଖା ପାଇଁ ୩୦ ହଜାର ଟଙ୍କାର ଚେକ୍ ଆର୍ଥିକ ସହାୟତା ଭାବେ ପ୍ରଦାନ କରାଯାଇଥିଲା। ଏହା ସହ ପଶ୍ଚିମ ଓଡ଼ିଶାର ପ୍ରସିଦ୍ଧ ଢୁଳିଆ କରୀମୁଣ୍ଡା ଗ୍ରାମର ବଳ ବାଗଙ୍କୁ ଫିଡ୍ ଟ୍ରଷ୍ଟ ପକ୍ଷରୁ ଫୁଲତୋଡ଼ା ଓ ଉତ୍ତରୀୟ ପ୍ରଦାନ କରି ସମ୍ମାନିତ କରାଯାଇଥିଲା। ଗରିବ ଓ ମେଧାବୀ ଛାତ୍ରଛାତ୍ରୀଙ୍କୁ ଉଚ୍ଚଶିକ୍ଷାରେ ଆଗେଇ ନେବା ପାଇଁ ଫିଡ୍ ଟ୍ରଷ୍ଟର ଏଭଳି ପ୍ରୟାସକୁ ବିଭିନ୍ନ ବୁଦ୍ଧିଜୀବୀ ମହଲରେ ପ୍ରଶଂସା କରାଯାଇଛି। ସ୍ମିତାରାଣୀଙ୍କ ଡାକ୍ତର ହେବାର ସ୍ୱପ୍ନ ପୂରଣ ପାଇଁ ଏହି ସହଯୋଗ ଏକ ନୂଆ ଆଶା ସୃଷ୍ଟି କରିଛି।

Bargarh, Bargarh (Baragarh) | Aug 31, 2026

MORE NEWS