नवी मुंबई महानगरपालिकेच्या वतीने स्वच्छता विषयक विविध उपक्रम राबविताना स्वच्छता ही एकत्रितपणे करण्याची गोष्ट असल्याचे लक्षात घेत लोकसभागावर भर देण्यात येत आहे. आज रविवारच्या सार्वजनिक सुट्टीच्या दिवशी संत निरंकारी मिशन या सेवाभावी संस्थेच्या माध्यमातून अमृत प्रकल्प अंतर्गत 'स्वच्छ जल, स्वच्छ मन' हे स्वच्छता अभियान नवी मुंबईत ठिकठिकाणी व्यापक स्वरूपात राबविण्यात आले. यामध्ये नवी मुंबई महानगरपालिका अधिकारी, कर्मचारी व स्वच्छताकर्मी यांच्याप्रमाणेच संत निरंकारी मिशनचे सदस्य मोठ्या संख्येने सहभागी झाले होते. ज्वेल ऑफ नवी मुंबई हे पर्यटकांचे नवी मुंबईतील आकर्षण केंद्र आहे. या ठिकाणी असलेल्या जलाशयाच्या परिसरात विशेष स्वच्छता अभियान राबविण्यात आले. शहर अभियंता शिरीष आरदवाड, अतिरिक्त शहर अभियंता अरविंद शिंदे स्यांच्यासह 250 हून अधिक संत निरंकारी मिशनचे स्वयंसेवक सहभागी झाले होते.
