ଲମତାପୁଟରେ ଦୁଇ ମାସ ଧରି ଗ୍ୟାସ ଶଙ୍କଟ। ଦୁଇ ମାସ ବିତିଲାଣି, ଗ୍ୟାସ ଶଙ୍କଟରୁ ମୁକ୍ତି ପାଉନାହାନ୍ତି ଲମତାପୁଟବାସୀ। କୋରାପୁଟ ଜିଲ୍ଲା ଲମତାପୁଟ ବ୍ଲକରେ ଏଚ୍ ପି ଗ୍ୟାସ ଯୋଗାଣରେ ଗୁରୁତର ଅବ୍ୟବସ୍ଥା ଦେଖାଦେଇଛି।ପ୍ରାୟ ଦୁଇ ମାସ ଧରି ଗ୍ୟାସ ସିଲିଣ୍ଡର ନ ପାଇ ଶତାଧିକ ଉପଭୋକ୍ତା ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଆଜି ଗ୍ୟାସ ଆସିବା ଖବର ପାଇ ସକାଳୁ ସକାଳୁ ଶତାଧିକ ଲୋକ ଡିଲର ପଏଣ୍ଟ ସମ୍ମୁଖରେ ଲମ୍ବା ଧାଡ଼ିରେ ଛିଡ଼ା ହୋଇଥିଲେ।ରୋଷେଇ ଗ୍ୟାସ ଅଭାବରେ ପରିବାରଗୁଡ଼ିକ ଦୈନନ୍ଦିନ ଜୀବନରେ ଗୁରୁତର ସମସ୍ୟା ଭୋଗୁଥିବା ଅଭିଯୋଗ କରିଛନ୍ତି। ଏହି ଡିଲର ପଏଣ୍ଟ ଉପରେ ଲମତାପୁଟ ସହ ପଡ଼ୋଶୀ ଆନ୍ଧ୍ରପ୍ରଦେଶର ଉପଭୋକ୍ତା ଏବଂ ପ୍ରାୟ ୧୦୦ କିଲୋମିଟର ଦୂରର ଲୋକମାନେ ମଧ୍ୟ ନିର୍ଭରଶୀଳ ଥିବାରୁ ସମସ୍ୟା ଆହୁରି ବଢ଼ିଛି। ସେପଟେ ବ୍ଲକ ଯୋଗାଣ ଅଧିକାରୀଙ୍କ କହିବା ଅନୁଯାୟୀ, ରାୟଗଡା ଡିପୋରେ ଗ୍ୟାସ ଯୋଗାଣ ସମସ୍ୟା ଥିବାରୁ ସିଲିଣ୍ଡର ଆସିପାରୁନଥିଲା। ଆଜି ଗ୍ୟାସ ପହଞ୍ଚିଥିବାରୁ ଉପଭୋକ୍ତାଙ୍କୁ ବଣ୍ଟନ କରାଯିବ ବୋଲି ସେ କହିଛନ୍ତି। ତେବେ ଅଭିଭକ୍ତ କୋରାପୁଟ ଜିଲ୍ଲାର ଅନ୍ୟ କୌଣସି ସ୍ଥାନରେ ଏଭଳି ଗ୍ୟାସ ସଙ୍କଟ ନଥିବା ବେଳେ କେବଳ ଲମତାପୁଟରେ କାହିଁକି ଏହି ପରିସ୍ଥିତି ସୃଷ୍ଟି ହୋଇଛି, ତାହାକୁ ନେଇ ଅଞ୍ଚଳବାସୀ ବିଭିନ୍ନ ପ୍ରଶ୍ନ ଉଠାଇଛନ୍ତି।