વાપી મહાનગરપાલિકાની સામાન્ય સભામાં વિકાસલક્ષી દરખાસ્તોને સર્વાનુમતે મંજૂરી: વેન્ડિંગ માર્કેટ, ટ્રાન્સપોર્ટ અને સફાઈ કામદારો અંગે મહત્વના નિર્ણયો
વાપી મહાનગરપાલિકા હસ્તકના મોરારજી દેસાઈ ભવન ખાતે મેયર દક્ષાબેન પટેલના અધ્યક્ષસ્થાને સામાન્ય સભા યોજાઈ હતી. જેમાં શહેરના સર્વાંગી વિકાસ, ઈન્ફ્રાસ્ટ્રક્ચર, ટ્રાફિક વ્યવસ્થા અને નાગરિક સુવિધાઓ સંબંધિત અનેક મહત્વપૂર્ણ દરખાસ્તોને સર્વાનુમતે બહાલી આપવામાં આવી હતી. સભામાં ડેપ્યુટી મેયર મીતેશ દેસાઈ, સ્થાયી સમિતિ અધ્યક્ષ સતીશ પટેલ, મ્યુનિસિપલ કમિશનર એન. એફ. ચૌધરી (IAS) સહિતના પદાધિકારીઓ અને કાઉન્સિલરો ઉપસ્થિત રહ્યા હતા.
સભામાં લેવાયેલા મુખ્ય નિર્ણયોમાં સીએમ મોર્ડન સ્ટ્રીટ વેન્ડિંગ માર્કેટ યોજના હેઠળ દરેક વોર્ડમાં લારી-ગલ્લા ધારકો માટે સુવ્યવસ્થિત જગ્યા ઊભી કરવા, શહેરના ROB/RUB પ્રોજેક્ટ માટે જમીન સંપાદન કરવા તેમજ શહેરી બસ સેવાના સંચાલન માટે Special Purpose Vehicle (SPV) ના રિવાઇઝ્ડ બોર્ડ ઓફ ડિરેક્ટર્સ અને શેર કેપિટલને મંજૂરી અપાઈ હતી. આ ઉપરાંત 5 વર્ષ પૂર્ણ કરનાર સફાઈ કામદારોની લાંબા ગાળાની નિમણૂક તેમજ વિકાસકાર્યોના કરાર અંગેની દરખાસ્તો પણ મંજૂર કરાઈ હતી. વિરોધ પક્ષના નેતા પીરૂભાઈ મકરાણી અને કાઉન્સિલર ક્રિષ્ના ભાનુશાલી દ્વારા ઉઠાવાયેલા ટેક્સ આકારણી અને પમ્પિંગ સ્ટેશનના પ્રશ્નો અંગે પણ યોગ્ય નિકાલની ખાતરી અપાઈ હતી. કમિશનરે શહેરને સ્વચ્છ રાખવા સહયોગની અપીલ કરી હતી.
વધુ સમાચારો અને માહિતી માટે @aapnu_vapi સાથે જોડાયેલા રહો!
Vapi, Valsad | Oct 1, 2026 
