स्थानिक गुन्हे शाखेची दमदार कारवाई; गावठी कट्टा व दोन जिवंत काडतुसांसह आरोपी जेरबंद प्रतिनिधी : जुबेर शेख धाराशिव : धाराशिव जिल्ह्यातील अवैध शस्त्र बाळगणाऱ्यांविरोधात स्थानिक गुन्हे शाखेने पुन्हा एकदा प्रभावी कारवाई करत एका आरोपीला गावठी कट्टा आणि दोन जिवंत काडतुसांसह अटक केली आहे. या कारवाईमुळे अवैध शस्त्रधारकांमध्ये खळबळ उडाली असून पोलिसांच्या सतर्कतेचे पुन्हा एकदा दर्शन घडले आहे. पोलीस अधीक्षक श्रीमती रितु खोखर आणि अपर पोलीस अधीक्षक श्री. सचिन पांडकर यांच्या मार्गदर्शनाखाली, तसेच स्थानिक गुन्हे शाखेचे पोलीस निरीक्षक श्री. विनोद इज्जपवार यांच्या आदेशानुसार मालमत्तेविषयक गुन्हे उघडकीस आणणे व अवैध शस्त्र बाळगणाऱ्या व्यक्तींवर कारवाई करण्यासाठी विशेष पथक गस्त घालत होते. दरम्यान, दि. १२ जून २०२६ रोजी येरमाळा चौक परिसरात पथकाला गोपनीय माहिती मिळाली की, शाम शिवाजी काळे (वय ३२, रा. झगडे गल्ली, भूम, ता. भूम, जि. धाराशिव) हा आंदोरा येथे पंचायतसाठी आला असून हॉटेल निसर्गसमोर थांबलेला आहे. तसेच त्याच्याकडे गावठी कट्टा असल्याची माहिती पोलिसांना मिळाली. माहितीची खातरजमा करून वरिष्ठांना कळविल्यानंतर स्थानिक गुन्हे शाखेच्या पथकाने तत्काळ घटनास्थळी धाव घेतली. हॉटेल निसर्गसमोर संशयित व्यक्ती दिसताच पोलिसांनी शिताफीने त्याला ताब्यात घेतले. त्याची अंगझडती घेतली असता कंबरेला खोवलेला लाकडी पिस्टल ग्रीप असलेला लोखंडी गावठी कट्टा आणि पँटच्या खिशात दोन जिवंत काडतुसे आढळून आली. या कारवाईत पोलिसांनी सुमारे ४६ हजार रुपये किमतीचा गावठी कट्टा व दोन जिवंत काडतुसे जप्त केली. आरोपीकडे शस्त्र बाळगण्याचा कोणताही वैध परवाना नसल्याचे निष्पन्न झाल्याने त्याच्याविरुद्ध कळंब पोलीस ठाण्यात शस्त्र कायद्यान्वये गुन्हा दाखल करण्यात आला आहे. आरोपीची वैद्यकीय तपासणी करून पुढील कायदेशीर कारवाईसाठी त्याला कळंब पोलीस ठाण्याच्या ताब्यात देण्यात आले आहे. ही यशस्वी कारवाई पोलीस अधीक्षक श्रीमती रितु खोखर, अपर पोलीस अधीक्षक श्री. सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक श्री. विनोद इज्जपवार, सहाय्यक पोलीस निरीक्षक श्री. सचिन खटके, पोलीस हवालदार विनोद जानराव, नितीन जाधवर, पोलीस नाईक बबन जाधवर तसेच रोहित दंडनाईक यांच्या पथकाने पार पाडली. अवैध शस्त्रधारकांविरोधातील ही कारवाई जिल्हा पोलिसांच्या गुन्हेगारीविरोधी मोहिमेतील आणखी एक महत्त्वाचे यश मानले जात आहे. नागरिकांनी संशयास्पद हालचाली किंवा अवैध शस्त्रांबाबत माहिती असल्यास तत्काळ पोलिसांना कळवावे, असे आवाहनही पोलिस प्रशासनाकडून करण्यात आले आहे. #DharashivPolice #LocalCrimeBranch #KalambPolice #IllegalWeapons #CountryMadePistol #PoliceAction #OsmanabadNews #VeerMaharashtraNews #CrimeNews #MaharashtraPolice #Dharashiv #BreakingNews #LawAndOrder #PoliceSuccess #Andora #Bhum #yermala