शेअर मार्केटमधील कोट्यवधींच्या तोट्यामुळे मुख्याध्यापकाचा टोकाचा निर्णय; पत्नी व दोन मुलांसह कुटुंब संपल्याने खळबळ प्रतिनिधी : जुबेर शेख बार्शी : सोलापूर जिल्ह्यातील बार्शी तालुक्यातील हत्तीज गावात एका मुख्याध्यापकाने आर्थिक विवंचनेतून पत्नी व दोन मुलांसह स्वतःचे जीवन संपवल्याची धक्कादायक घटना उघडकीस आली आहे. शेअर मार्केटमधील गुंतवणुकीत मोठा तोटा झाल्याने आणि सुमारे १ कोटी ८० लाख रुपयांचे कर्ज झाल्याच्या नैराश्यातून हा टोकाचा निर्णय घेतल्याची प्राथमिक माहिती समोर आली आहे. मिळालेल्या माहितीनुसार, संबंधित मुख्याध्यापक हे नंदुरबार जिल्ह्यातील जिल्हा परिषद शाळेत कार्यरत होते. गेल्या काही वर्षांपासून त्यांनी शेअर मार्केटमध्ये मोठ्या प्रमाणात गुंतवणूक केली होती. मात्र अपेक्षित नफा मिळण्याऐवजी मोठे आर्थिक नुकसान झाले. त्यातून कर्जाचा डोंगर उभा राहिल्याने ते प्रचंड मानसिक तणावाखाली होते, अशी माहिती समोर येत आहे. घटनास्थळी तब्बल २६ पानी सुसाईड नोट आढळून आली असून त्यामध्ये त्यांनी आर्थिक अडचणी, वाढते कर्ज आणि त्यातून निर्माण झालेली मानसिक घालमेल याबाबत सविस्तर उल्लेख केल्याचे समजते. पोलिसांनी ही नोट जप्त करून तपासासाठी पाठवली आहे. या घटनेमुळे हत्तीज गावासह संपूर्ण बार्शी तालुक्यात शोककळा पसरली आहे. एक सुशिक्षित आणि जबाबदार पदावर कार्यरत असलेल्या व्यक्तीवर आर्थिक संकटाचा एवढा मोठा परिणाम झाल्याने नागरिकांमध्ये हळहळ व्यक्त होत आहे. दरम्यान, पोलिसांनी घटनास्थळी पंचनामा करून तपास सुरू केला असून सुसाईड नोट, आर्थिक व्यवहार आणि कर्जाच्या संदर्भातील कागदपत्रांची पडताळणी केली जात आहे. तपासानंतर या प्रकरणातील नेमकी कारणे स्पष्ट होणार आहेत. या घटनेने पुन्हा एकदा शेअर मार्केटमधील जोखमीची गुंतवणूक, आर्थिक नियोजनाचा अभाव आणि वाढत्या कर्जबाजारीपणाचे गंभीर परिणाम अधोरेखित केले आहेत. आर्थिक अडचणी किंवा मानसिक तणाव निर्माण झाल्यास कुटुंबीय, मित्रपरिवार किंवा तज्ज्ञांची मदत घेणे किती आवश्यक आहे, याचीही जाणीव या घटनेतून होते. #Barshi #Solapur #ShareMarket #BreakingNews #MaharashtraNews #VeerMaharashtraNews #CrimeNews #FamilyTragedy #ZPSchool #Headmaster #Maharashtra