જિલ્લા કલેક્ટર શ્રી મનીષ ગુરવાનીએ જલાલપોર તાલુકાના દિપલા ગામની આકસ્મિક મુલાકાત લઈ વહીવટી અને વિકાસલક્ષી કામગીરીની સ્થળ સમીક્ષા કરી હતી. મુલાકાત દરમિયાન તેમણે ગ્રામ પંચાયત, આરોગ્ય મંદિર, વાજબી ભાવની દુકાન, આંગણવાડી કેન્દ્ર અને મહાત્મા ગાંધી મંદિર પ્રાથમિક શાળાની ગ્રાઉન્ડ લેવલની કામગીરી ચકાસી હતી. કલેક્ટરશ્રીએ ગ્રામ પંચાયતમાં જન્મ-મરણના દાખલાઓ માટે નિયત દરથી વધુ ફી ન વસૂલવા અને સરકારી સેવાઓ સમયસર પૂરી પાડવા કડક આદેશ આપ્યા હતા. આ ઉપરાંત, પીવાના પાણી અને સ્વચ્છતાના પ્રશ્નોનું સ્થળ પર જ નિરાકરણ લાવવા અધિકારીઓને સૂચના આપી હતી. આંગણવાડીના બાળકોના આરોગ્ય-પોષણ તથા પ્રાથમિક શાળાના શિક્ષણની ગુણવત્તા પર વિશેષ ધ્યાન આપવા સંબંધિત કર્મચારીઓ અને સ્ટાફને જરૂરી માર્ગદર્શન પૂરું પાડ્યું હતું.
