ફતેહગંજ વિસ્તારમાં બેંક ઓફ બરોડા સામે ફૂટપાથ પર વર્ષોથી નાનો બુકસ્ટોલ ચલાવતા અને એમ.એસ. યુનિવર્સિટીના હજારો વિદ્યાર્થીઓ સહિત પુસ્તકપ્રેમીઓમાં અત્યંત લોકપ્રિય એવા પ્રદીપભાઈનું દુઃખદ નિધન થયું છે. તેમના અવસાનના સમાચાર વહેતા થતાં જ શહેરના સાહિત્ય જગત અને વિદ્યાર્થી આલમમાં ઘેરા શોકની લાગણી વ્યાપી ગઈ છે. પ્રદીપભાઈ ભલે ફૂટપાથ પર નાનો સ્ટોલ ચલાવતા હતા, પરંતુ તેમના વિચારો ખૂબ જ ઉમદા હતા. તેઓ પુસ્તક વેચાણને માત્ર એક વ્યવસાય નહીં, પરંતુ જ્ઞાન અને માનવતાના પ્રસારનું માધ્યમ માનતા હતા. તેમની ઉદારતા એવી હતી કે જો કોઈ વ્યક્તિ આર્થિક સંકડામણને કારણે પુસ્તક ખરીદી ન શકે, તો તેઓ તેને પ્રેમપૂર્વક પુસ્તક ભેટ આપી દેતા હતા. તેમના નિધનથી ફતેહગંજનો એ જાણીતો સાહિત્યિક ખૂણો આજે સદાય માટે સૂનો થઈ ગયો છે. વડોદરાના અસંખ્ય વાચકો અને વિદ્યાર્થીઓ સોશિયલ મીડિયા પર તેમને ભાવભીની શ્રદ્ધાંજલિ અર્પણ કરી રહ્યા છે.