दिग्रस तालुक्यातील मोठी रुई येथे एका बत्तीस वर्षीय विवाहित युवकाने गळफास घेऊन आत्महत्या केल्याची घटना आज शनिवारी सकाळी उघडकीस आली. महादेव रामदास ढगे वय बत्तीस वर्ष, राहणार मोठी रुई तालुका दिग्रस असे आत्महत्या करणाऱ्या युवकाचे नाव आहे. मृतक महादेव हा मोठी रुई येथे आपल्या पत्नी व मुलांसह वास्तव्यास होता. त्याच्या आईचे तीन वर्षांपूर्वी निधन झाले असून वडील हलाखीच्या परिस्थितीमुळे पुणे येथे कामानिमित्त गेले होते. सध्या तो पत्नी व मुलांसह राहात होता. घटनेच्या एक दिवस आधी पत्नी व मुले बाहेरगावी गेले असताना, महादेव याने आपल्या राहत्या घरी दोरीच्या साहाय्याने गळफास घेऊन आत्महत्या केल्याचे समोर आले आहे. या घटनेची माहिती मिळताच पोलीस पाटील किशोर चव्हाण यांनी तातडीने दिग्रस पोलीस ठाण्याला कळविले.