Ward No. 138 ki Corporator Roshan Irfan Shaikh ka pad hua khatam BMC ne Ward No. 138 (M-East Ward) ki Corporator Roshan Irfan Shaikh ka nagarsevak pad adhikarik taur par samapt kar diya hai. BMC ke mutabik, Roshan Irfan Shaikh ka OBC (BCC) caste certificate District Caste Certificate Verification Committee, Parbhani ne 27 April 2026 ko amanya (invalid) ghoshit kar diya tha. Iske baad Municipal Commissioner ke 7 July 2026 ke order ke aadhar par Mumbai Municipal Corporation Act, 1888 ke Section 16(1C)(a) ke tahat unka corporator pad 27 April 2026 se hi swayam radd (automatically terminated) maana gaya hai. Is sambandh mein BMC ke Assistant Election and Town Duty Officer Dattatray Giri ne 8 July 2026 ko adhikarik patr jaari karte hue iski jankari di. Ab Ward No. 138 ki rajneetik sthiti par sabki nazrein tiki hui hain aur aage ki prakriya ka intezar kiya ja raha hai.