১নং বৰঙ্গাজুলী নালাপাৰাত শ্ৰী শ্ৰী জগন্নাথ মহাপ্ৰভুৰ ৰথযাত্ৰা উৎসৱ জাকজমকতাৰে উদযাপন। ওদালগুৰি জিলাৰ ১নং বৰঙ্গাজুলী নালাপাৰাত শ্ৰী শ্ৰী জগন্নাথ মহাপ্ৰভুৰ পৱিত্ৰ ৰথযাত্ৰা উৎসৱ এইবাৰো অতি জাকজমকতাৰে উদযাপন কৰা হয়। প্ৰায় ৬০ বছৰ ধৰি অঞ্চলটোত এই ঐতিহ্যবাহী ৰথযাত্ৰা অনুষ্ঠিত হৈ আহিছে, যিয়ে স্থানীয় লোকসকলৰ মাজত এক বিশেষ ধৰ্মীয় আৰু সাংস্কৃতিক পৰম্পৰা হিচাপে স্থান লাভ কৰিছে। উৎসৱ উপলক্ষে স্থানীয় ৰাইজে আন্তৰিক সহযোগিতা আগবঢ়োৱাৰ লগতে অঞ্চলটোৰ বাহিৰৰ বিভিন্ন প্ৰান্তৰ পৰাও হাজাৰ হাজাৰ ভক্ত আৰু দৰ্শনাৰ্থীৰ সমাগম ঘটে। আয়োজকসকলৰ মতে, প্ৰতি বছৰৰ দৰে এইবাৰো প্ৰায় ৫ হাজাৰৰো অধিক লোকৰ উপস্থিতি লক্ষ্য কৰা যায়। ভক্তপ্ৰাণ ৰাইজে ভগৱান জগন্নাথ দেৱৰ ৰথ টানিবলৈ আৰু সেৱা-ভক্তিত অংশগ্ৰহণ কৰিবলৈ উৎসাহেৰে আগবাঢ়ি আহে। অনুষ্ঠানস্থলীত সৰু পৰিসৰত মেলা-বজাৰৰো আয়োজন কৰা হয়, যাৰ ফলত উৎসৱৰ আনন্দ আৰু অধিক বৃদ্ধি পায়। উল্লেখযোগ্য যে, এই অনুষ্ঠানৰ উদযাপন সমিতিৰ সভাপতি টোটন চৰকাৰ আৰু সম্পাদক দিলীপ অধিকাৰীৰ নেতৃত্বত সমগ্ৰ কাৰ্যসূচী সফলতাৰে সম্পন্ন হয়।