व्यापाऱ्यांच्या आंदोलनाला यश; नगराध्यक्षांच्या मध्यस्थीनंतर तोडगा महाद्वार परिसरातील दुकानदारांना एक फूट फुटपाथ व तीन फूट सायवानची परवानगी देण्याचे आश्वासन प्रतिनिधी : जुबेर शेख तुळजापूर : तुळजापूर शहरातील महाद्वार परिसरात अतिक्रमण हटाव मोहिमेनंतर निर्माण झालेल्या परिस्थितीमुळे नाराज झालेल्या व्यापाऱ्यांच्या आंदोलनाला अखेर यश आले आहे. नगराध्यक्ष विनोद गंगणे यांच्या मध्यस्थीने आणि मुख्याधिकारी अजिंक्य रणदिवे यांच्या उपस्थितीत झालेल्या चर्चेनंतर व्यापाऱ्यांच्या काही प्रमुख मागण्यांवर सकारात्मक तोडगा निघाला असून दुकानदारांना एक फूट फुटपाथ व तीन फूट सायवान वापरण्याची परवानगी देण्याचे आश्वासन प्रशासनाकडून देण्यात आले आहे. महाराष्ट्राची कुलस्वामिनी आणि साडेतीन शक्तीपीठांपैकी पूर्ण शक्तीपीठ असलेल्या आई तुळजाभवानीच्या पवित्र नगरीत काही आठवड्यांपूर्वी नगरपरिषदेने अतिक्रमण हटाव मोहीम राबविली होती. या मोहिमेमुळे महाद्वार चौक व परिसरातील रस्ते आणि सार्वजनिक जागा मोकळ्या झाल्या असल्या, तरी अनेक लहान-मोठ्या व्यापाऱ्यांच्या व्यवसायावर त्याचा प्रतिकूल परिणाम झाल्याची भावना व्यापारी वर्गात निर्माण झाली होती. दरम्यान, पावसाळा जवळ येत असल्याने दुकानाबाहेर ठेवण्यात येणारा माल सुरक्षित ठेवणे, ग्राहकांना संरक्षण मिळणे आणि व्यवसाय सुरळीत चालविणे या दृष्टीने व्यापाऱ्यांनी प्रशासनाकडे तीन फूट फुटपाथ व पाच फूट सायवान वापरण्याची मागणी केली होती. मात्र या मागणीवर तत्काळ निर्णय न झाल्याने भवानी रोड आणि महाद्वार रोड परिसरातील व्यापाऱ्यांनी दुकाने बंद ठेवून आंदोलन सुरू केले. आंदोलनादरम्यान व्यापाऱ्यांनी आणखी एक महत्त्वाची मागणी पुढे केली. मंदिर संस्थानमार्फत बंद करण्यात आलेला महाद्वार मार्ग पूर्ववत सुरू करून भाविकांना त्या मार्गाने प्रवेश देण्यात यावा, अशी मागणी व्यापाऱ्यांकडून करण्यात आली. भाविकांची वर्दळ वाढल्यास स्थानिक व्यवसायांनाही चालना मिळेल, असा व्यापाऱ्यांचा दावा होता. दुपारी सुमारे चार वाजण्याच्या सुमारास नगराध्यक्ष विनोद गंगणे यांनी आंदोलनस्थळी भेट देत व्यापाऱ्यांशी थेट संवाद साधला. यावेळी त्यांनी व्यापाऱ्यांच्या अडचणी आणि मागण्या समजून घेतल्या. त्यानंतर त्यांनी आमदार राणाजगजितसिंह पाटील यांच्याशी दूरध्वनीवरून चर्चा करून विषयाची माहिती दिली. मुख्याधिकारी अजिंक्य रणदिवे यांच्या उपस्थितीत झालेल्या बैठकीत विविध पर्यायांवर चर्चा करण्यात आली. चर्चेनंतर व्यापाऱ्यांना दिलासा देणारा निर्णय जाहीर करण्यात आला. त्यानुसार व्यापाऱ्यांना एक फूट फुटपाथ आणि तीन फूट सायवान वापरण्याची परवानगी देण्याचे आश्वासन देण्यात आले. प्रशासनाच्या या भूमिकेमुळे व्यापाऱ्यांमध्ये समाधानाचे वातावरण निर्माण झाले असून सुरू असलेले आंदोलन मागे घेण्यात आले आहे. या निर्णयामुळे व्यापारी आणि प्रशासन यांच्यातील तणाव निवळला असून पावसाळ्याच्या पार्श्वभूमीवर व्यापाऱ्यांना काही प्रमाणात दिलासा मिळणार आहे. तसेच भविष्यात शहरातील वाहतूक व्यवस्था, भाविकांची सोय आणि व्यापाऱ्यांचे हित यांचा समतोल साधत निर्णय घेण्याची अपेक्षा व्यक्त केली जात आहे. #तुळजापूर #Tuljapur #आईतुळजाभवानी #महाद्वार #व्यापारीआंदोलन #व्यापाऱ्यांनाआश्वासन #नगरपरिषदतुळजापूर #विनोदगंगणे #अजिंक्यरणदिवे #राणाजगजितसिंहपाटील #अतिक्रमणहटावमोहीम #महाद्वारचौक #भवानीरोड #स्थानिकबातम्या #धाराशिव #OsmanabadNews #MaharashtraNews #BreakingNews #VeerMaharashtraNews #वीरमहाराष्ट्रन्यूज