उस्मानाबाद-बीड-लातूर विधान परिषद निवडणुकीत भाजपचे पारडे जड? राजकीय घडामोडींना वेग प्रतिनिधी : जुबेर शेख धाराशिव : उस्मानाबाद-बीड-लातूर स्थानिक स्वराज्य संस्था मतदारसंघाच्या विधान परिषद निवडणुकीची रणधुमाळी सध्या शिगेला पोहोचली असून महायुतीचे उमेदवार बसवराज पाटील आणि महाविकास आघाडीचे उमेदवार महेश देशमुख यांच्यात थेट लढत रंगणार आहे. निवडणुकीच्या पार्श्वभूमीवर दोन्ही उमेदवारांकडून मतदारांच्या गाठीभेटी, बैठका आणि प्रचार यंत्रणा मजबूत करण्यावर भर दिला जात आहे. राजकीय वर्तुळात मात्र सध्या महायुतीचे उमेदवार बसवराज पाटील यांचे पारडे जड असल्याची चर्चा सुरू आहे. तिन्ही जिल्ह्यांतील स्थानिक स्वराज्य संस्थांमधील सदस्यसंख्या, पक्षीय गणिते आणि महायुतीकडे असलेली संघटनात्मक ताकद यामुळे बसवराज पाटील यांना आघाडी मिळण्याची शक्यता व्यक्त केली जात आहे. राजकीय जाणकारांच्या मते, उस्मानाबाद, बीड आणि लातूर या तिन्ही जिल्ह्यांमध्ये भाजप व महायुतीशी संबंधित मतदारांची संख्या तुलनेने अधिक असल्याने निवडणुकीत महायुतीला फायदा होऊ शकतो. काही तज्ज्ञांनी तर ही निवडणूक एकतर्फी होण्याची शक्यता वर्तविली आहे. मात्र निवडणुकीच्या अंतिम टप्प्यातील राजकीय समीकरणे, अपक्ष मतदारांची भूमिका आणि स्थानिक पातळीवरील संपर्क मोहीम यावर निकाल अवलंबून राहणार आहे. दुसरीकडे महाविकास आघाडीचे उमेदवार महेश देशमुख यांच्यासाठीही पक्षातील वरिष्ठ नेते, पदाधिकारी आणि कार्यकर्ते मैदानात उतरले आहेत. मतदारांना एकत्र ठेवण्यासाठी तसेच संभाव्य क्रॉस व्होटिंग रोखण्यासाठी महाविकास आघाडीने विशेष रणनीती आखल्याची चर्चा आहे. तिन्ही जिल्ह्यांमध्ये बैठका, संवाद दौरे आणि समन्वय बैठकींचे सत्र सुरू असून विजयासाठी सर्वतोपरी प्रयत्न केले जात आहेत. या निवडणुकीसाठी 18 जून रोजी मतदान होणार असून 22 जून रोजी मतमोजणी पार पडणार आहे. त्यामुळे मतदारांनी नेमका कौल कुणाच्या बाजूने दिला, महायुतीचे वर्चस्व कायम राहते की महाविकास आघाडी बाजी मारते, याकडे संपूर्ण मराठवाड्याचे लक्ष लागले आहे. सध्या तरी राजकीय चर्चांमध्ये महायुतीचे उमेदवार बसवराज पाटील यांना आघाडी असल्याचे चित्र दिसत असले, तरी अंतिम निकाल मतपेटीतूनच स्पष्ट होणार असल्याने पुढील काही दिवस प्रचाराच्या दृष्टीने अत्यंत महत्त्वाचे मानले जात आहेत. #Osmanabad #Beed #Latur #VidhanParishadElection #BasavarajPatil #MaheshDeshmukh #Mahayuti #MVA #MaharashtraPolitics #Election2026 #veermaharashtranews #महाराष्ट्र_बातम्या #धाराशिव #MaharashtraNews #BJPGovernment #dharashiv #PratapSarnaik #TopNews #BreakingNews #PoliticalNews #BREAKING #TopNews