महाड नगर परिषदेची निवडणूक तापली असतानाच शहरात अघोरी कृत्यांचा सुळसुळाट सुरू झाल्याने महाड हादरून गेलं आहे. विधानसभा निवडणुकीत मोठ्या प्रमाणावर चर्चेत आलेले “ओम फट स्वाहा” प्रकरण पुन्हा एकदा निवडणूक रणधुमाळीत डोकं वर काढत आहे. त्यामुळे नागरिकांमध्ये भीतीचं सावट पसरलं आहे. २ डिसेंबरच्या मतदानाच्या आधी ही घटना घडल्याने राजकीय वातावरण अधिकच तंग झालं आहे. चवदार तळे परिसरातील रहिवाशांनी पहाटे रस्त्यावर विचित्र आणि संशयास्पद वस्तू पाहिल्या. फोडलेला नारळ, लाल कुंकू, तांत्रिक चिन्हं, काळी बाहुली आणि लाल भोपळा! ही रचना पाहता हा अघोरी विधी असल्याचा संशय बळावला. विशेष म्हणजे, हे सर्व साहित्य नेमकं "ट्युलिप" इमारतीसमोरच ठेवलेलं होतं, ज्यामुळे नागरिकांचा संशय अधिकच गहिरा झाला.