औसा -महाराष्ट्राचे सुपुत्र वेदमूर्ती देवव्रत महेश रेखे यांनी वयाच्या अवघ्या 19व्या वर्षी वैदिक परंपरेतील अत्यंत कठीण मानला जाणारा शुक्ल यजुर्वेद माध्यंदिन शाखेचा ‘दंडक्रम पारायण’ काशी येथे यशस्वीरीत्या पूर्ण करत ऐतिहासिक कामगिरी केली आहे. या पारायणात तब्बल 2000 वैदिक मंत्रांचे शुद्ध आणि अचूक उच्चारण आवश्यक असते. ही कठोर साधना, एकाग्रता आणि प्रचंड आध्यात्मिक सामर्थ्याची कसोटी मानली जाते. देवव्रत यांनी ही कार्यसिद्धी साधत आपल्या प्रतिभेची उज्ज्वल छाप उमटवली आहे.