वणी येथून प्रवासी घेऊन नांदेपेराकडे निघालेल्या तीनचाकी प्रवासी ऑटोला समोरून येणाऱ्या भरधाव ट्रकने जोरदार धडक दिल्याने भीषण अपघात घडला. या अपघातात ऑटोचा अक्षरशः चेंदामेंदा झाला असून त्यातील सात प्रवासी जखमी झाले आहेत. जखमींपैकी दोघांची प्रकृती अत्यवस्थ असल्याने त्यांना पुढील उपचारासाठी चंद्रपूर येथे रेफर करण्यात आले आहे. ही दुर्घटना मंगळवारी सायंकाळी सुमारे 8 वाजताच्या सुमारास वणी-नांदेपेरा मार्गावरील वांजरी गावाजवळ घडली.
