दिग्रस तालुक्यातील वरंदळी येथे एका अल्पवयीन मुलीला लग्नाचे आमिष दाखवून पळवून नेल्याची गंभीर घटना उघडकीस आली आहे. या प्रकरणी दिग्रस पोलीस ठाण्यात संशयित युवकाविरोधात गुन्हे दाखल करण्यात आले असून पोलीस पुढील तपास करीत आहेत. मिळालेल्या माहितीनुसार, अल्पवयीन मुलीचा भाऊ व आई ऊसतोडणीसाठी बाहेरगावी गेले होते. वडील शेतातील पिकाची राखण करण्यासाठी गेले असताना मुलगी काकूजवळ झोपली होती. दि. १८ जानेवारी रोजी रात्रीच्या सुमारास संशयित शुभम गणेश जाधव वय-२० वर्षे, रा. शेलु कोपरा, ता. पुसद याने लग्नाचे आमिष दाखवून अल्पवयीन मुलीला पळवून नेल्याचा संशय मुलीच्या वडिलांनी व्यक्त केला आहे. अल्पवयीनच्या वडिलाने या घटनेची तक्रार दि. २० जानेवारी रोजी रात्री दिग्रस पोलीस ठाण्यात दिली.