नवी मुंबई शहराची ओळख आधुनिक शहर म्हणून सर्वदूर असून अनेक देशी-परदेशी अभ्यासक, विद्यार्थी नवी मुंबई शहराला भेटी देऊन नवी मुंबईतील नाविन्यपूर्ण प्रकल्प, उपक्रम यांची माहिती घेत असतात. अशाच प्रकारे आज गुरुवारी दुपारी २ च्या सुमारास सिंगापूर मॅनेजमेंट युनिव्हर्सिटीच्या विद्यार्थी समुहाने नवी मुंबई महानगरपालिका मुख्यालयास भेट देऊन विविध प्रकल्प, कामांची माहिती व त्यामधील वेगळेपण जाणून घेतले. रिलायन्स फाऊंडेशन इन्स्टिट्यूट ऑफ एज्युकेशन ॲण्ड रिसर्च या शैक्षणिक संस्थेच्या माध्यमातून सिंगापूर मॅनेजमेंट युनिर्व्हसिटीच्या 20 विद्यार्थी समुहाने आज नवी मुंबई महानगरपालिका मुख्यालयास भेट दिली. यावेळी महापालिका सचिव श्रीम.चित्रा बाविस्कर यांनी त्यांचे स्वागत केले. यावेळी महापालिका सल्लागार समुहाने महानगरपालिका क्षेत्रातील वैशिष्ट्यपूर्ण प्रकल्पांची व उपक्रमांची माहिती संबंधित अभ्यासगटास दिली.
