चिखली–अमडापूर मार्गावर मंगळवारी (९ डिसेंबर) रात्री साडेनऊच्या सुमारास दोन कारची समोरासमोर धडक होऊन मोठा अपघात झाला. या दुर्घटनेत तिघेजण गंभीर जखमी झाले असून दोन्ही कारचे मोठे नुकसान झाले आहे. टाकरखेड-हेलगा येथील राजेश नामदेव हिवाळे (३५) हे एमएच 28 BO 3115 क्रमांकाच्या कारने अमडापूरच्या दिशेने जात असताना, समोरून येणारी एमएच 12 GF 753 क्रमांकाची कार अचानक त्यांच्या वाहनावर आदळली. या दुसऱ्या कारमध्ये सावरखेड येथील अक्षय सुरुशे आणि त्यांचे पाहुणे प्रवास करत होते. धडकेची तीव्रता एवढी होती की दोन्ही वाहनांचे समोरचे भाग अक्षरशः उध्वस्त झाले. एअरबॅग वेळेवर उघडल्याने तिघांचे जीव वाचले; मात्र त्यांना गंभीर दुखापती झाल्या असून चिखली येथील रुग्णालयात उपचार सुरू आहे